Tum mujh ko yad karo mai tum ko yad rakhoonga

Hazrat Thanvi r.a. farmatay hain k ALLAH tala ne Quran pak may farmaya k Tum mujh ko yad karo mai tum ko yad rakhoonga, farmaya k ye zikrullah ka asli samra (hasil/sila) hai k agar isko mustehzar rakha jaey to kabhee tashweesh na ho

ALLAH se naik guman rakhnay ka umda tareeqa

Hazrat Hakeem-ul-Ummat Thanvi r.a. farmatay hain k ALLAH Tala se naik guman aur umeed rakhnay ka umda tareeqa ye hai k is ki poori itaa'at aur farmanbardari ki koshish karay. Ye tabai baat hai k jis ki itaa'at ki jati hai is se sub tarha ki umeedain rehti hain aur nafarmani se zaroor dil ko wehshat aur na umeedi ho jati hai

Jab mayoosi ho k maqbool hoon ya naheen to daman-e-mustafa pakar lena

Aik buzurg farmatay hain k jab kabhee shetan mayoos karnay lagay k aur waswasa dalay k maqbool hoon ya naheen to daman-e-mustafa pakar lena. Kyoon k ye esa maqbool rasta hai k maqbool bana he deta hai. Is rastay may mayoosi hai he naheen.


Naqsh-e-Qadam Nabi (1) k hain jannat k rastay
ALLAH (2) se milatay hain sunnat krastay

(1) sallallah-o-alaihi wasallam
(2) jalla jala luhuoo

(Shaikh-ul-arab wal-ajam arif billah Hazrat-e-Aqdas Hazrat Molana Shah Hakeem Muhammad Akhtar Sahab Damat Barkatuhum)

Apnay amaal ki taraf har giz tawajja na karay

Hazrat wala ne farmaya k "jab chal chalao ka waqt ho to apnay amaal ki taraf har giz tawajja na karay, bus apnay RUBB-e-kareem ki rehmat aur karam ki umeed par nazar rakhtay huay ALLAH ki bargah may hazir ho. Amaal to karay lekin amaal ki taraf se tawajja hata le. Warna shetan mayoos karay ga k amaal to kuchh bhee naheen kye aur yoon ALLAH ki taraf se tawajja hata kar amaal k under mashghool kar k qalb ko tashweesh may mubtila kar de ga aur nazar ALLAH ki rehmat aur karam se hut jaey gee."

Aik buzurg farmatay hain k "amal se iwaz milta hai jab k ishq se ALLAH milta hai. Fitna-e-dajjal k waqt may bohat se log isi waja se mayoos ho jaaingay. Lihaza ishq bari nemat hai. Tamam amaal kar k bhee amaal par nazar na karay. Umeed ko khauf par ghalib rakhay, warna mayoosi honay lagay gee. Aur mayoosi  se dil may qalq hota hai aur qalq se talluq ma'ALLAH ghat'ta hai jab k rija se bashashat hoti hai aur bashashat se talluq ma'ALLAH barhta hai.

ALLAH tala asbab ko qata kar k tawajjo ilal-haq ko qavi kartay hain

Hazrat Thanvi r.a. ne farmaya k baaz dafa ALLAH tala asbab ko qata kar k tawajjo ilal-haq ko qavi kartay hain. Ye mamla apnon k sath kya jata hai k tamam asbab ko he chheen lye to sirf ALLAH he ka asra reh jata hai aur poori nigah ALLAH ki taraf bus ho jati hai, to ye bhee to ain rehmat he hai. Ghairon k paas to asbab he asbab hotay hain.

ALLAH k khas bandon ki alamat

Aik buzurg farmatay hain k ALLAH k khas bandon ki alamat ye hai k jab shetan un k dilon may gunah ka waswasa dalta hai to kaanp uthtay hain aur foran sajday may gir jatay hain. Gunah k taqazay par foran amal kar lena alamat hai k abhee khas naheen huay. Aulia ALLAH masoom to naheen hotay lekin mehfooz ho jatay hain.

Zaroori naheen k jo mau'ood ho wo maqsood bhee ho

Hazrat Thanvi r.a. ne farmaya k zaroori naheen jo cheez mau'ood ho wo maqsood bhee ho. jesay Quran pak may wada hai k tum istighfar karo ge to ALLAH asman se barish barsaey ga, aur tumharay maal aur aulad ko bhee barha de ga. To yahan agar istighfar se maal aur aulad mil bhee gaey to ALLAH ka wada to poora ho gya lekin is se ye lazim nahee ata hai maal aur aulad maqsad bhee hon. Agar ye maal aur bv bachay maqsad hotay to kabhee fana naheen hotay. Kyoon k maqsad ko weeran naheen kya jata. Maqsad ko weeran aur khatam koi be-waqoof he karta hai. Aur ALLAH tala har aib se pak hai. Lihaza isi se pata chala k maal aur aulad maqasid may se naheen.

Buzurgon ki sohabt se noor-e-eeman qavi aur deen may rusookh hota hai

Buzurgon ki sohbat se noor-e-eeman qavi hota hai aur deen may rusookh paida hota hai. Hazrat wala ne farmaya k buzurgon k tazkiray se bhee dil noor se bhar jata hai

Qabz may jab aur taraqqi hoti hai to haibat kehlati hai

Hazrat Thanvi r.a. ne farmaya k jab qabz may aur taraqqi hoti hai to haibat kehlati hai. Lihaza mayoos aur parishan na ho. Us k baad jab ifaqa hota hai to phir uns ho jata hai.

Jitna ghayb par yaqeen zyada ho ga utna he sunnaton par amal zyada ho ga

Aik buzurg farmatay hain k Jitna ghayb par yaqeen barhay ga utna he sunnaton par zyada amal ho ga

Dua bhee zikr hai lihaza is may bhee aitidal chahye

Dua may bhee itna zyada na roay k ghair moatadil ho jaey. Aitidal k sath dua karay baqi ALLAH par bharosa karay aur nateejay ko ALLAH k supurd kar k ALLAH k faisalay par razi rahay. Rona gana bhee aik qisam ki be-sabri he hai. Is se to yehi maloom hota hai k ALLAH se badguman hai aur aitimad naheen hai. Bohat zyada dua may rona riza bil qaza k bhee khilaf hai.

Dua bhee choon k zikr ki aik qisam he hai, lihaza is may bhee aitidal rahay, itna na roay k faraiz mutassir honay lagain aur ikhlaq kharab ho jaain.

Ab na ponhchay un ko mujh se koi gham
ay mere ashk-e-nadamat ab to thum!!!

Tawakkul k baad khauf-e-azmaish

Tawakkul ikhtiar karnay k baad bhee halka sa aik tabaee aur ghair ikhtiari khauf rehta hai k agar is k mukhalif ho gya to phir kya ho ga? to us k ilaj ye hai k ALLAH tala se azmaish se pana maang le. Aur is ka raaz ye hai k tawakkul k baad bhee jo khauf rehta hai to agar us ka hasil nikala jaey to wo "Khauf-e-azmaish" he hai. Isi lye azmaish he se pana maang le to us khauf aur ghair ikhtiari tashweesh may aitidaal aa jaey ga.

ALLAH poochhay k kya laey ho to gunah pesh kar dena

Aik buzurg farmatay hain k jab ALLAH banday se poochhain k kya laya hai mere lye to apnay gunahon ki gathree aur nadamat pesh kar dena k ya-ALLAH mere paas to kuchh naheen tha sirf ye gunah laya hoon, aur aap kareem hain aur Kareem kharab aur ghatia cheez bhee le leta hai

Asbab bhee ALLAH ki mashiat k tabay hain

Hazrat Thanvi r.a. ne farmaya k asbab bhee ALLAH tala ki mashiat k tabay hain. Asbab may barkat bhee dua he se ati hai

Halal ya Haram kamana insan k apnay ikhtiar may hai

Aik dafa aik buzurg namaz parhnay k lye masjid aa rahay thay, jab masjid par ponhchay to bahir aik yahoodi khara tha us ko kaha k tum ye ghora dekhtay rehna mai namaz parh k ata  hoon. Jab namaz parh kar bahir niklay to dekha k wo ghulam yahoodi bhee ghaayb aur ghoray par zeen bhee na thee...samnay aik dukan par nazar pari to dekha k un k ghoray ki wo zeen us dukan may latki hui thee...dukan walay se zeen ka poochha to us ne kaha k 1 dirham ki hai...un buzurg ne aik sard aah bhari aur farmaya k "AAH! mai abhee namaz k baad us zalim ko 1 dirham ujrat k taur par denay he wala tha, lekin us ne jaldi ki aur wo aik dirham haram se hasil kya". To rizq to muqaddar may jitna jis k hissay may likha hai utna us ko mil kar he rahay ga lekin ye banday k ikhtiar may hai us ko halal se hasil karay ya haram se.

qalq se talluq maa'ALLAH ghat'ta hai aur bashashat se barhta hai

Hazrat Thanvi r.a. ne farmaya k "Qalq se talluq maa'ALLAH ghat'ta hai aur bashashat se talluq maa'ALLAH barhta hai"

yani baaz dafa soofi aur salikeen apnay ooper gham ko qasdan taree kar k ronay ko taree kartay hain aur samajhtay hain k taraqqee ho rahi hai halaan k qalq se gham aur mayoosi hoti hai jis se talluq ghat'ta hai jab k agar bashashat ho to mazeed amaal karnay ka jee chahta hai aur taraqqee aur qurb ka madaar amaal par hai na k kayfiaat par. Apnay ikhtiar se dil par gham ko taree karnay se dil ko tashweesh hoti hai aur salik ko chahye k apnay dil ko tamam tashweeshaat aur khatraat se pak rakhay

Jazbaat pay he apnay shaad na reh ay majzoob
jazbaat haich hain gar murattab amal na ho

Tafweez

Apnay har mamlay (deeni aur dunyavi) ko poori tarha ALLAH k supurd karnay k baad phir sochnay bhee na, kyoon k jab doodh peeta be-bus bacha maa baap ka mohtaj hota hai aur be-fikr hota hai to hum kyoon apnay ALLAH par andha aitmad naheen kartay? Dua karnay k baad kyoon be-fikr naheen hotay. Dua karnay k baad kamil aitimad rakhain aur nateejay par ALLAH se razi rahain

Wasawis zakir qalb may naheen atay ghafil qalb may atay hain

Wasawis zakir qalb may naheen atay ghafil qalb may atay hain...shetan andheray may rehta hai. zikr se dil msg noor ajata hai. Aur noor atay he shetan bhag nikalta hai kyun k dil k andheray khatam ho jatay hain. isi lye wasawis bhee bhag jatay hain. jesay light na ho to andheray ki waja se dar lagta hai k kaheen gir na jaoon thokar na lag jaey. Lekin jesay he light aa jaey to phir koi waswasa naheen hota. roshan may har cheez wazay nazar ati hai. isi tarha zikr se bhee noor ajata hai phir koi khof bhee naheen rehta aur har cheez haqeeqat may dekhta hai. is lye wasawis ki waja ziker na karna hai yani qalb ka ghafil hona hai yani andheron may shetan ka ghar hona. isi lye mashaaikh kasrat se ziker karwatay hain. maidan-e-karzar may isi lye kasrat-e-ziker ka kaha hai takay wasawis na aain aur mustaqeem rahain

Lazzat-e-faryad toofano may hai

Lazzat-e-faryad toofano may hai...kon kehta hai kinara chahye
aap par har dam fida ho meri jaan...ghair ki mujh ko na parwa chahye

Durood shareef ki fazeelat

Huzoor sallallah-o-alaihi wasallam ne farmaya k jo mujh par durood bhejta hai mai us k lye dua karta hoon

Sukoon sirf ALLAH he ki yad may hai

Na dolat se na dunia se na ghar abad karnay se
Tasalli dil ko milti hai KHUDA ko yad karnay se

Taqwa k inamat

Taqwa k inamat:

1. har kaam may asani
2. museebaton se nijat
3. be-hisab rizq
4. noor-e-fariq (haq aur batil may farq karnay wala noor) ata hota hai
5. noor-e-sakeena dil may nazil hota hai aur depression, tension se nijat milti hai
6. ba-lutf zindagi hasil hoti hai
7. izzat-o-ikram milta hai
8. ALLAH ki wilayat hasil hoti hai
9. Gunahon ka kaffara ho jata hai
10. Akhrat may maghfirat

Tauheed

1. Jab admi ALLAH par bharosa kar leta hai to phir ALLAH us k lye kafi ho jatay hain.

2. Tum ALLAH se jesa guman karo ge wesa he mamla ho ga, kyoon k hadees pak may hai k mai apnay banday k guman k mutabiq mamla karta hoon

3. ALLAH tala se mustaqil husn-e-zan rakhna aik mustaqil ibadat hai

4. Apni hajat har ik se na kehtay phiro k ye ALLAH ki shikayat karna hai makhlooq se. Aur shuker zyada kartay raho, jab banda shuker naheen karta to phir shikwa shikayat he karta hai. ALLAH ki raza par razi raho ALLAH ki bhee kamil riza mil jaey gee

5. Jis ne namaz ki fikr chhori ALLAH ne bhee us ki fikr chhor dee Utha k sir tumharay astan se...zameen par gir para mai asman se Jab banda ALLAH ka zikr chhor deta hai to phir parishanian gher leti hain

"Haal" Aur "Maqam" - Sahib-e-Haal aur Sahib-e-Maqam ka farq

log aulia k maqamat ko pata naheen kya samajhtay hain. amal par dawam se haal hasil ho jata hai aur jab haal may rusookh ho jaey to wo maqam kehlata hai. jesay larko ko ramzan may namaz ka khoob shoq hota hai, to 30 din may wo un ka haal bun jata hai, us k baad thori see himmat kar k aur mehnat kar lain to us haal may rusookh paida ho jata hai jo maqam kehlata hai. Bus yehi maqamat kehlatay hain. Kisi ko namaz may rusookh hai to namaz may maqam, aur kisi ko nazar ki hifazat may rusookh hai to nazar ki hifazat may maqam, kisi ka jihad may maqam, kisi ka tableegh may maqam aur kisi ka ilm-o-fiqh aur hadees may maqam waghaira. Aksar log sahib-e-nisbat naheen ho patay, haal he se wapis lot jatay hain, thori se mehnat aur kar lain to maqam hasil ho jaey aur sahib-e-maqam ho jain. Shetan bhee haal he se wapis lot gya tha, sahib-e-nisbat na ho paya tha isi lye mardood ho gya. Jesay kisi ne 1 saal tak nazar bachai phir badnazri kar lee to ye haal se wapis lot gya. Thora aur mujahida kar leta to maqam hasil ho jata, kyoon k haal k baad dubara aoud naheen hua karta.

Khayal bhee to aik nemat hai

Khayal bhee to aik nemat hai. Nemat ka shukar karo ge to aur barhay gee aur agar na-shukri ki to achhay khayalat ana band ho jaaingay. Shukr ye hai k achhay khayal dil may laey buray khayalat ko na laey. Agar buray khayalat aain to apnay ikhtiar se hata kar achhay khayal se tabdeel karay. Buray khayalat may: ganday ganday khayalat, makhlooq se badgumani, ALLAH tala se husn-e-zan na hona waghaira. ALLAH tala se mustaqil husn-e-zan rakhna aik mustaqil ibadat hai. Rozana ALLAH ki rehmat ka intezar karna afzal ibadat hai. Lihaza aur nematon ki tarha nemat-e-khayal ka bhee agar shukr karay ga to ye nemat achhay khayalat ki aur barhay gee

ALLAH walo ki sohbat farz-e-ain hai

Hazrat wala ne farmaya k jo ALLAH walon se cut gya us ki misal cuti hui patang ki see hai. Jesay jab patang cut jati hai to us ki chaal bata deti hai k ab is ki dor kisi k hath may naheen rahi. wo dagmagati hui lehrati hui jati hai. phir aakhir may gnaday bachay us ko lootnay bhagtay hain aur akhir may chheena jhapti kar k phaar detay hain. Isi tarha ALLAH walon se jo door ho jata hai phir us ko nafs-o-shetan aur gumrah kun agencyaan gher leti hain.

Ilm zinda rehta hai takrar se...Aur ishq zinda rehta hai sohbat-e-abrar se
Muddat k baad phir teri yadon ka silsila...ik jism-e-natawan ko tawanai de gya

Hazrat Thanvi r.a. ne farmaya k rizq may esi mashghooliat jo admi ko ALLAH walo se door kar de, go k ehl-e-fatawa us ko jaaiz kahain lekin mai us par haram ka fatwa deta hoon. Aur farmaya k is zamanay may ehlullah ki sohbat farz-e-ain hai. Kyoon k pehlay ALLAH walo se doori hoti hai, phir mashghooliat barhti hai jis se amaal chhootna shuru ho jatay hain phir is se rooh kamzor ho jati hai aur nafs mota ho jata hai. phir gunahon ka sudoor shuru ho jata hai.

Maqsad se jab admi hat'ta hai to parishaniaan gher leti hain

Maqsad se jab admi hat'ta hai to beemariaan aur parishaniaan gher leti hain. Gaaey bhayns apnay maqsad yani doodh denay may lagi hui hain jabhee bohat kam beemar nazar aaingi. Jab doodh dena chhor deti hain to bimar ho jati hain aur zibah kar di jati hain. Insan bhee jab apnay maqsad se hat jata hai to bimraiaan aur masaain gher letay hain. Aur maqsad ALLAH tala ne quran pak may bayan farmaya hai k hum ne jin-o-ins ko apni ibadat k lye paida kya hai

Eeman-e-kamil k sath parishani jama naheen ho sakti

Hazrat Thanvi r.a. ne farmaya k Eeman-e-kamil k sath parishani jama naheen ho sakti. Jab tauheed kamil ho jati hai to sabr bhee kamil ho jata hai.

Husn-e-Zan k asraat murattab hotay hain

Husn-e-Zan k asraat murattab hotay hain. Hz. wala ne farmaya k "soch aur fikr se deen k qilay fatah hotay hain" aur farmaya k "khayali pulao banana bhee ibadat hai" yani ALLAH se khoob naik guman rakhay. Hz. Thanvi r.a. ne farmaya k "apnay khayalat ko husn-e-zan se bhar lo" Quran pak ki ayat hai k "Fa-iza azamta fatawakkal alallah" yani Ay nabi alaihissalam jab aap kisi baat ka azm kar lain to phir ALLAH par bharosa rakhain. is may taleem ye hai k jab admi azm kar le to phir ab ALLAH par bharosa rakhay.

dushmano ka paida hona bhee mujahida hai

bhala in ka moo hai k mere moo ko atay...ye dushman un he ubharay huay hain
baaz dafa insan may ujub aur kibr anay ka andesha hota hai to ALLAH tala us k khilaf kuchh dushmano ko ubhar detay hain, ya koi aur masaaib bhej detay hain, jis se us ko huzn hota hai aur ujub-o-kibr se hifazat rehti hai. Hz. Thanvi farmtay hain k huzn khud aik bohat bara mujahida hai. Hazrat Thanvi ne farmaya k "logon ki muhabbat aur hujoom se andesha tha ujub ka, ALLAH ne khansi de dee"

har shakhs ko muhabbat baqadr-e-istedaad dee jati hai

har shakhs ko muhabbat baqad-r-istedaad dee jati hai, warna istedaad se zyada de dee to tahammul na ho ga. isi lye bohat se logon ne shaikh se poochhay baghair zikr to kar lya jis se taqat to aai lekin tahammul se zyada honay ki waja se bardasht na kar sakay aur pagal ho gaey. isi istedad ko paida karnay k lye mujahida karaya jata hai.

ab mujahidat ki bhee 2 qismain hain: 1. ikhtiari, 2. ghair-ikhtiari. Ikhtiari mujahidat (zikr, nawafil waghaira) se to noor paida hota hai lekin ghair ikhtiari mujahidaat (yani bimari, parishani, gham, dushmano ka khof, tangdasti waghaira.) se istedaad barhti hai. Kyoon k huzn khud aik bohat bara mujahida hai. to jis ko zyada muhabbat deni hoti hai to ko masaaib de kar istedad barhai jati hai phir jab qalb may tahammul paida ho jata hai to us k baqadar muhabbat de dee jati hai. aik hikmat ye bhee hai k ikhtiari mujahidat se ujub-o-kibr ka jo andesha hota hai to huzn de kar us se hifazat kar dee jati hai.

Ibadat se to qurb milta hai lekin gunah chhornay se ALLAH ki riza milti hai

Ibadat se to qurb milta hai lekin gunah chhornay se ALLAH ki riza milti hai. qurb bhee 2 tarha k hain. jesay mujrim bhee darbar may badshah k qareeb hota hai aur shehzaday bhee. lekin shehzaday ko badshah ki riza hasil hai jab k mujrim ko naheen. shetan bhee ibadaat se muqarrab to ho gya lekin us ko riza hasil naheen thee.

khof 2 qisam k hotay hain: tabai khof, aqli khof

khof 2 qisam k hotay hain:
1. tabai khof
2. aqli khof

tabai khof to muzir naheen aur na he fitrat k khilaf hai. ye ambia ko bhee hua hai. jesay hazrat moosa a.s. ne asa phenka to wo saanp bun gya jis se wo daray, ye to tha tabai khof. jab k aqli khof ye hai k ghar k under hai aur bahir kutta bhonk raha hai aur darwazay ki kundi bhee laga hui hai phir bhee dar raha hai. ye aqli khof hai jo k muzir hai.

Ghaffari k sath sath sattari lazim hai

Ghaffari k sath sath sattari lazim hai, yani ALLAH tala jis ko maaf farmatay hain phir us ki parda poshi bhee farmatay hain, lihaza sattari k lye ghaffari karaey. jis shakhs ki ALLAH tala ne duni may parda poshi farmai ye alamat hai inshaALLAH isay akhrat may bhee ruswa naheen honay daingay.

parishani hoti hai khilaf-e-tawaqqo se

Hazrat Thanvi r.a.r ne farmaya k "parishani hoti hai khilaf-e-tawaqqo se aur ehlullah ne to apni tawaqqoaat ko khatam he kar dala" Hazrat gangohi r.a. ne farmaya k "dunia may is tarha rahi jesay tanha ho". Yani admi jab kisi se tawaqqoaat ko wabista kar leta hai aur agar us k khilaf ho jaey to parishani hoti hai isi lye siwa-e-ALLAH tala k har aik se tawaqqoaat ko khatam kar de. hatta k shaikh, maa, baap, behn bhai, aur bv bachon se bhee.

ye jah kar marz bhee zalim bhee aam ho gya hai

Hazrat Thanvi ne farmaya k "ye jah kar marz bhee zalim bhee aam ho gya hai log chahtay hain k koi hamari burai he na karay" aur farmaya k "tawaqqo tazeem ki na rakhay makhlooq se"

be-deen admi se dushmani mat karo kyoon k us k hudood naheen hoteen

Hz. Thanvi r.a. ne farmaya k "be-deen admi se dushmani mat karo kyoon k us k hudood naheen hoteen. jab wo dushmani karay ga to har had se guzar mutajawiz ho sakta hai jab k deendar admi to phir sochta hai hudood se darta hai" aik sher usool k tor par hazrat thanvi r.a. ne taleem farmaya k "jab 2 moozion may khat pat...to apnay bachnay ki fikr kar jhat pat" aur phir farmaya k "sukoot aur sukoon k sath alaihida ho jaey"

jo gumrahi ka kaam kartay hain un ko asbab-e-gumrahi bhee dye jatay hain

Hazrat wala ne farmaya k jo gumrahi ka kaam kartay hain un ko asbab-e-gumrahi bhee dye jatay hain aur jo hidayat ka kaam kartay hain top phir un ko asbab-e-hidayat bhee muhayya kye jatay hain. isi lye batil firqay walon ki kitab, koi taqreer bhee na parho, kaan laga kar tajassus se suno bhee naheen, kya maloom koi jumla esa ho jo dil may utar jaey aur phir us ka waswasa na nikal sakay. dil tassur le leta hai. un ki tehreer libas, hatta k jaey namaz aur tasbeeh may bhee zulmat hoti hai. wasawis aur ishkalat dil may aa saktay hain. aur agar waswasay aa jain to foran auzubillah aur "aamantu billahi warusulihi" parh lain.

jisay mili ho ishrat bari hasrat k baad...us par akhtar fana naheen aati

"jisay mili ho ishrat bari hasrat k baad...us par akhtar fana naheen aati".

mujahidaat k baad jo nemat hasil hoti hai us ki phir dil may qadar bhee bohat hoti hai. lekin nemat ko apnay mujahidaat ka samara samajhna nemat ki na-shukri hai. kya hamara mujahida aur talab is qabil hai? Hazrat wala ne farmaya k un k karam ka sabab bhee un ka karam he hai aur un ki rehmat ka sabab bhee un ki rehmat he hai.

barbad-e-muhabbat ko na barbad karaingay...mere dil-e-nashaad ko wo shaad karaingay

haal aur qaal mojib-e-qurb naheen, mojib-e-qurb sirf amaal hain

Hazrat thanvi r.a. ne farmaya k "haal aur qaal mojib-e-qurb naheen, mojib-e-qurb sirf amaal hain." yani kefiaat se admi samajhta hai k qurb hasil ho gya, halan k esa naheen hai. na to kefiaat se ALLAH milta hai aur na he zyada baaton, bayan bazi aur hazir jawabi se ALLAH milta hai. ALLAH tala sirf amal se milta hai, ittiba-e-sunnat k rastay milta hai. Bayanat se doosron ko to faida shayad ho jaey lekin khud ko faida jabhee ho ga jab tak k amal na karay ga. Hazrat Shaikh-ul-Hadees molana Zakria r.a. taqreer naheen kartay thay, sirf sabaq parhatay thay, lekin kaam un se kitna hua, ye wohi dard-e-dil aur sunnat-e-nabvi sallallah-o-alaihi wasallam se ishq hai k deen ka kaam hua. jo khud ba-amal naheen hota to wo chahay lakh taqreerain kar le barkat nahee hoti.

tawaqqo kamal ki chhorna wajib hai

Hazrat Thanvi r.a. ne farmaya k "tawaqqo kamal ki chhorna wajib hai" yani esi tawaqqoaat ko khatam karna wajib hai k mai itna bara buzurg bun jaoon ya falan maqam hasil ho jaey. ye bhee talib-e-maqam hai. maqsood to sirf amal hai aur amal se amal se maqsood ALLAH ki riza hai. Hazrat haji imdadullah mahajir makki r.a. ne farmaya k "kaam par nazar chahye samaray par na chahye"

Arif hona koi bari baat thori hai, asal cheez to yehi faqeeri hai

Arif hona koi bari baat thori hai, asal cheez to yehi faqeeri hai aur apnay ko mitana hai. khali jan lenay se kya hota hai, janta to shetan bhee tha, lekin under kibr ka zehr tha. maarifat to darasal yehi k admi ALLAH ki azmaton se waqif ho jaey jis se apni haqeeqat ko pehchan le k mai kuchh naheen hoon. tab maarifar ki kuchh haqeeqat naseeb ho gee. warna admi sirf malfoozaat ratnay se kuchh naheen hota.

jab mehr hua numayan...sub chhup gaey taray...wo bhari bazm may humain tanha nazar aey

apnay ko kuchh samajhna ibleesiat k siwa kuchh naheen

apnay ko kuchh samajhna ibleesiat k siwa kuchh naheen. hum is dunia may apnay ko mita kar apnay Mola ko wusool karnay k lye aey hain. (Hazrat Maulana Abdul Mateen Sb. d.b. -

Khalifa-e-Majaz Hazrat Wala Hazrat Maulana Shah Hakeem Muhammad Akhtar sb. d.b. - Bangladesh)

Apnay ko naqis samajhna k mazeed taraqqee ho ye mubarak hai

Hazrat thanvi r.a. ne farmaya k "apnay ko naqis samajhna k mazeed taraqqee ho, ye to mubarak hai, lekin jab is se mayoosi honay lagay aur tark-e-amaal ka sabab banay to ab ye jaiz naheen" aur farmaya k "fuzool jan ko ghulana nemat-e-jan ki na-qadri hai" yani mazi aur mustaqbil ki soch may ghulana

admi apnay ko sari zindagi kuchh na samjhay

Hazrat thanvi r.a. ne farmaya k "apnay ko sari zindagi kuchh na samjhay, aur istighfar aur mualijay he may apni zindagi ko khatam kar de"

apnay kamalaat par nazar aamaal ko tark kara deta hai

Apnay ko ba-kamal to samajh saktay hain lekin afzal naheen. jesay agar koi hafiz-e-quran ya alim hai to us ko kamal to behr haal hasil hai, to wo apnay ko aam admi k muqablay may ba-kamal to samajh sakta hai lekin us se afzal naheen samajh sakta. Afzaliat ka ilm ALLAH tala he ko hai

Hazrat thanvi r.a. ne farmaya k "apnay kamalaat par nazar aamaal ko tark kara deta hai" yani apnay ko ba-kamal to admi samajh sakta hai lekin is ko orhna bichhona he na bana le k har waqt apnay he kamalaat ko soch rahay hain.

shaikh k samanay apni qabliat ka izhar sakht be-adabi hai

shaikh k samanay apni qabliat ka izhar sakht be-adabi hai. Mureedeen apnay achhay halaat to batatay hain lekin buray halaat naheen, ye alamat hai k ikhlas naheen hai aur islah ki sachi talab naheen hai. waja ye hai k under jaah chhupi hoti hai k meri tareef ho aur mujhe daant na paray. ye mukhlis naheen hai.

DUA ka falsafa

Duaon ki jald qubooliat ka aik bohat bara nuskha ye hai k ALLAH tala se is baat par razi ho jaey k "ya ALLAH meri ye dua agar maut tak bhee qubool naheen hui to martay dum tak mai razi rahoonga" ALLAH tala ko itna pyar ata hai k "achha ye banda hum se razi rahay ga, laao is ka ye kaam kar do"

dua qubool to ho jati hai lekin zuhoor ALLAH pak jab behtar samajhtay hain us waqt kartay hain. ooper dua may qubool ba-maani zuhoor k hain. yehi riza-bil-qaza hai jo ikhlas se bhee ooncha maqam hai. kyoon k jo har har moqay par ALLAH k har faislay par razi ho to is se barh kar mukhlis aur kon ho ga isi lye ye riza-bil-qaza ikhlas se bhee ooncha maqam hai. aur har tajveez baqa-e-nafs ki daleel hai. yani tajweez ka baqi hona daleel hai k nafs abhee mita naheen zinda hai.

tajveez kehtay hain k apni raey ko baqi rakhna jo k nafs k na mitnay ki alamat hai aur tafweez ye hai k apnay har deeni aur dunyavi maamlay ko kulli taur par ALLAH k supurd kar dena aur apni raey yani tajweez ko khatam kar dena)

Tadabeer may sub se qavi tadbeer dua hai. tadbeer na karna jihalat aur is par bharosa karna himaqat hai, yani tadbeer to karay lekin is par bharosa na karay, bharosa sirf ALLAH tala ki zaat aur un k hukum par ho. tadbeer aur dua k baad jo na-muradi ho wo ALLAH ki murad hoti hai. tadbeer may barkat bhee dua he se ati hai.
jab zameen pay na ho tadbeer-e-zamanto kyoon na jaey aah soo-e-asmaan

Lekin dua se bhee qavi aik tadbeer hai aur wo hai "ALLAH ko razi karna". kyoon k jab wo razi ho jatay hain to phir sub kaam khud he bana detay hain. jesay baap bachay se naraz ho to tofee bhee naheen deta, lekin jesay he bacha ro ro kar apnay abba ko mana leta hai to baap na sirf maaf karta hai balkay inaam-o-ikraam ki barish bhee kar deta hai. isi tarha ALLAH tala se jab maafi maang kar un ko razi kar letay hain to phir wo na sirf maaf kartay hain balkay nawazishaat bhee khoob kartay hain. aur jitna samajhdar bacha hota hai wo usi hisab se mangta hai. jesay chhota bacha tofee mangta hai, thora aur samajhdar hota hai to cycle mangta hai aur samajhdar hota hai to motor-bike aur car mangta hai, aur samajhdar hota hai to bangla factory mangta hai kyoon k agar bachay ko pata ho k mera abba bohat ameer hai aur bohat khazanay hain to kam naheen mangay ga. isi tarha jo banda jitna zyada ALLAH ka arif ho ga yani ALLAH ko janta ho ga usi qadar mangay ga.

aik sahab ne hazrat wala se kaha k chhota moo aur bari baat hai hamari itni auqat kahan k bari cheez mangain, to Hazrat wala ne farmaya k apnaa moo dekh kar naheen un ki shan dekh kar maango. hamara moo to is qabil bhee naheen k aik niwala bhee dya jaey. lihaza un ki shan aur un k karam k sadqay may maango.

jesay aik badshah ne aik kisan se kaha k hum tujhe apna dost banatay hain. to us ne kaha huzoor agar aap ne mujhe apna dost banaya to jab aap mere ghar aaingay to aap to hathi pay beth kar aaingay to meri to jhonpri hai, na mai rahoonga na meri jhonpri. to badshan ne kaha be-waqoof jis ko hum dost banatay hain to phir pehlay us ka ghar bhee apnay hisab se he banwatay hain phir hum us k ghar atay hain.
matlab ye hai k jis ko ALLAH apna banatay hain phir us k hoslay bhee buland hotay hain phir wo chhoti cheez naheen maangta us ko jab nemat detay hain to nemat ka tahammul bhee detay hain.

Hazrat wala ne farmaya k "apnay ko ehl samajh kar agar dua ki jaey to dua qubool naheen hoti, apnay ko na-ehl samajh kar maango". log kehtay hain k hum zarooriaat-e-zindagi k to mustahiq hain, ye aqeeda sahee naheen ghalat aqeeda hai. Hazrat wala ne farmaya k apna aqeeda durust kar lo k hum zarooriaat-e-zindagi k bhee mustahiq nshee hain. hum ALLAH ki milk hain wo jesa chahay tasarruf karain. ye sub ata mehz ALLAH ka karam hota hai.

Duaon may yaqeen amaal (namaz, zikr-o-tilawat) ki pabandi k baghair naheen ata.

dua ka falsafa ye hai k baaz dafa koi kaam esa hota hai k itni miqdar may dua karay ga to phir qubool ho ga aur us ka zuhoor ho jaey ga. aulia ALLAH ki duain is lye jald qubool ho jati hain k wo gunah naheen kartay. masla ye hota hai k hum dua bhee kartay hain lekin beech may gunah bhee kar bethtay hain jis se duaon ki qubooliat may der hoti hai. jesay koi kaam esa hai k jis k lye 100 duaon ki miqdar muqarrar hai. ab agar beech may 15 gunah bhee kar dye to 100 k bajaey ab 115 duain chahye hongee kyoon k pehlay 15 to gunahon k badal chhatnay may lag jaingee aur phir baqi 100 poori karni hongee takay wo kaam ho jaey. yani jo kaam 100 duaon may hona tha ab 15 gunahon ki waja se 100 k bajaey 115 duaon may ho ga. lekin aik baat hai k yaa to aik aik dua kar k 100 ki tadad ko poora karay ya phir aik he dua esi karay jo 100 ki tadaad k barabar ho aur direct kaam ho jaey. yani itna zor se ALLAH k samnay roay aur sijda gaah ko ro ro kar tar kar de k foran us ka kaam ho jaey.

har dua ka qubool ho jana alamat-e-maqbooliat naheen. Dua to shetan ki bhee qubool hui thee. apni manwana kamal naheen . kamal to ye hai k un ki maan kar chalay. isi lye mayoos na ho. un ki maan raha hai to kuchh fikr naheen. shuru may salikeen ko duaon may tabai yaqeen to hasil hota hai lekin wo aksar "haal" hota hai "maqam" naheen hota hai. is k rusookh k lye phir salik ko mujahidat se guzara jata hai. aik buzurg farmatay hain k mai ne apnay iradon k tootnay se ALLAH ko pehchana. to baaz dafa taweel arsay tak dua ka zuhoor naheen hota. ye waqfa-e-tarbiat hota hai, takay dua k yaqeen k sath riza-bil-qaza ka sabaq pakka ho jaey aur rusookh kar k maqam bun jata hai. aur ye riza ka maqam ikhlas se bhee ooncha maqam hai. aur ye hasil hota naheen jab tak k iraday na tootain aur phir us par wo tafweez na karay

neki se dil khush hona aur gunah se ghamgeen hona eeman ki alamat hai

Hadees pak ka mazmoon hai k "jab neki k baad dil khush ho aur gunah k baad ghamgeen ho to ye alamat-e-eeman hai". Hazrat thanvi r.a. ne farmaya k ye neki par dil ka khush hona biz-zatihi (yani apni zaat ka kamal) naheen hai balkay un ki nazr-e-karam ki waja se hota hai. isi tarha gunahon par dil ka maghmoom hona bhee biz-zatihi naheen hai balkay un ki nazr-e-karam ka sadqa hota hai. lihaza neki par khush to ho lekin apna kamal samajh kar naheen un ki ata samajh kar khush ho.

Insani shakal may humain jo paida farmaya is nemat ka bhee shukr karay

aik buzurg farmatay hain k ALLAH ne insani shakal may paida farmaya to ye bhee to nemat hai jis ka hum shukr ada naheen kartay. aur phir ooper se eeman islam aur is ummat may paida kar dena ye un ka kitna bara karam aur mehz un ki ata hai.

ALLAH k khof se niklay huay ansoon ki waja se marood naheen hota

Hazrat wala ne farmaya k jis shakhs ka zindagi may aik bar bhee ALLAH ki muhabbat ya khof se aik ansoo bhee nikla ho ga mera zoq ye hai k wo mardood naheen ho ga inshaALLAH. wo ansu raaigaan naheen jata. wo ALLAH k khazano may mehfooz ho jata hai. ab agar wo shakhs bohat door bhee kahee nikal gya aur ALLAH se door ho gya aur aik zamana bhatakta raha lekin ALLAH tala usay naheen bhooltay, apnay khazano may se us ka wo ansu phir dubara nikaltay hain aur farishton ko hukum hota hai k jao hamaray us banday ko talash karo, kahan chala gya hamara wo banda jo kabhee hamari yad may roya tha, jao phir us k dil may tofeeq dalo k ye banda hamari yad may kabhee roya tha.

muddat k baad phir teri yaadon ka silsila
ik jism-e-natawaan ko tawanaai de gya

lag chuka tha dil qafas may phir pareeshan kar dya
hum safeeron tum ne kyoon phir zikr-e-gulistan kar dya

(yani hamara dil to is dunia k pinjray may he mutma'in ho gya tha aur is ki rangeen teelion may gum ho gaey thay k bahir se phir koi ALLAH wali chirya aai jis ne gulistan ka yani us ka tazkira chher dya aur phir se un ki yaad taza ho gai aur dubara un ka naam lenay ki tofeeq ho gai)

ALLAH tala hamaray lye kafi hain

ALLAH tala Quran pak may farmatay hain k "hum ne is zameen-o-asmaan ko paida kya hai aur hum he bhala na janaingay is k baray may" to jis ne humain paida kya hai to kya wo hamari zaroorton se waqif naheen ? !!! to ALLAH tala se deen, sehat, rizq, izzat, afiat, dolat sub kuchh mango, to phir jab mushkil ka waqt ata hai to ALLAH tala us banday ko zaya naheen kartay, k is ne hum se maanga hua hai, rizq ka masla aya to us k lye ko maanga tha afiat k dino may ab wohi maanga hua aur wohi duaain kaam aaingee

Aur ALLAH tala Quran pak may hain k "Kya ALLAH apnay apnay banday k lye kafi naheen" to phir hum kyoon fikr kartay hain

Muhabbat kya hai dil ka dard se mamoor ho jana

Muhabbat kya hai dil ka dard se mamoor ho jana
mata-e-jaan kisi ko sonp kar majboor ho jana

qadam hain raah-e-ulfat may to manzil ki hawas kesay
yahan to ain manzil hai thakan se choor ho jana

yahan to sir se pehlay dil ka soda shart hai yaro
koi asan hai kya sarmad-o-mansoor ho jana

basa lena kisi ko dil may dil he ka kaleja hai
paharon ko to bus ata hai jal kar toor ho jana

nazar se door reh kar bhee taqi wo paas hain mere
k meri ashiqi ko ayb hai mehjoor ho jana

(Hazrat Mufti Taqi Usmani Sb. Db.)

khof alamat-e-maqbooliat hai

hazrat wala ne farmaya k kisi achhay amal k baad ye khof hona k qubool hua k naheen to ye alamat-e-maqbooliat hai us amal ki. Hadees pak ka mazmoon hai k "neki se dil khush ho aur gunah se dil maghmoom ho to ye eeman ki nishani hai"

Hazrat Thanvi r.a. ne farmaya k "neki ko ALLAH ki ata samajh kar khush hona biz-zatihi naheen balkay ALLAH ki nazr-e-karam ki waja se dil khush hua, isi tarha gunah se dil ka ghamgeen hona ye biz-zatihi naheen hai, mehz ALLAH ki nazr-e-karam ki waja se hai" matlab ye k neki par dil khush hona aur gunah par ghamgeen hona bhee hamara kamal naheen balkay ALLAH k nazr-e-karam ki waja se hota hai.

Hazrat wala ne farmaya k jab admi apni nazar may achha hota hai to ALLAH ki nazar may bura hota hai aur jab apni nazar may bura hota hai to ALLAH tala ki nazar may achha hota hai

jis amal may nafsaniat ho gee to us se logon ko nafrat ho gee

Hazrat thanvi r.a. ki ajeeb tehqeeq hai k "jis amal may nafsaniat ho gee to us se logon ko nafrat ho gee" jesay naseehat kartay waqt tanz ya tehqeer ho, ya banawati tawazo ho,

ya dikhaway ka taqwa ho, ya badnazri aur haseeno se bachnay ka tazkira kar raha hai lekin khud is ka dil us tazkiray se mazay le raha hai to esi nafsaniat se logon k dilon may

muhabbat k bajaey nafrat paida ho gee

shukar har qisam k khazanay aainda k lye hasil karnay ki kunji hai

Hazrat Dr. Abdul Hai Arfi r.a. ne farmaya k "shukar har qisam k khazanay aainda k lye hasil karnay ki kunji hai. jo nemat zyada lena chaho us ka shukr ada kar lia karo. aur har nemat zaroori hai. is lye har nemat ka shukr he karta rahay.

Hazrat Dr. Abdul Hai Arfi r.a. ne farmaya k "istighfar se abdiat aur shukr se maarifat paida hoti hai" yani jab istighfar admi karta hai to wo bandgi ka izhar hota hai k mujh se khata hui aur mai farishta naheen hoon banda hoon lihaza mujhe maaf kar dain. aur is se aajzi aur tawazo paida hoti hai jo k ALLAH ko mehboob hai.

isi tarha shukr se maarifat hasil hoti hai. yani har har nemat ki taraf jab admi dhihan karta hai to kehta hai k ye to ALLAH ki ata hai us ka shukr hai aur jis ka mai mustahiq naheen tha. to jitni nematain dekhta rehta hai to utna utna he ALLAH ko pehchanta jata hai aur shukr karta rehta hai aur ALLAH ki muhabbat dil may paida hoti chali jati hai. isi lye aap sallallah-o-alaihi wasallam is kaainat k sub se baray arif hain, sayyid-ul-aarifeen hain sub se zyada ALLAH ko pehchannay walay hain. kyoon k aap sallallah-o-alaihi wasallam ne har har moqay ki duain sikhla deen. isi lye jo jitna muttab-e-sunnat hota chala jaey ga utna he bara aarif aur waliullah bun jaey ga. yehi waja hai k masnoon amaal aur duaaon k ehtimam ko ulema ne kasrat-e-zikr kaha hai.

ehl-e-muhabbat aur ehl-e-aqeedat

Hazrat thanvi r.a. ne farmaya k ehl-e-muhabbat se hazz hota hai (yani be-takallufi hoti hai to maza ata hai) jab k ehl-e-aqeedat se bojh hota hai (yani lihaz rakhna parta hai). lihaza ehl-e-muhabbat banain. aur shaikh se esa talluq na ho k us ko islah k maamlay may lihaz rakhna paray.

sahaba jab Aap Sallallah-o-alaihi wasallam ko hadya detay thay to muhabbat he ki waja se detay thay us waqt un k zehn may risalat ka khayal bhee na hota tha (matlab ye k muhabbat ki waja se detay thay mehz aqeedat ki waja se naheen)

Hazrat thanvi r.a. se kisi ne kaha k kya muhabbat he ki waja se aqeedat naheen hoti to farmaya "naheen! kyoon k bacho se muhabbat hoti hai aqeedat naheen"

doosron ko half-mind aur apnay ko full-mind samajhna alamat-e-kibr hai

doosron ko half-mind aur apnay ko full-mind samajhna alamat-e-kibr hai. mubtila-e-jehl pay rehm karna sunnat hai. bohat se log qabil hotay hain lekin maqbool naheen hotay. aur bohat se log maqbool hotay hain qabil naheen hotay. lekin bohat se log qabil bhee hotay hain aur maqbool bhee.

agar poori kaainaat may aik shaks ko bhee haqeer samajhta hai to ye bhee mutakabbir hai. jesay beevi, behn bhai, ya baap boorha ho gya to kehtay hain k 60 ka ho gya to sathiya gya, ye sub kibr hai.

nemat ka aik shukar ye bhee hai k dimagh kharab na ho

1. Hazrat thanvi r.a. ne farmaya k nemat ka aik shukar ye bhee hai k dimagh kharab na ho.

2. jo log maashray may zaleel samjhay jatay hain un ki tazeem karay

har parhez gaar (muttaqi) ka noor hota hai

har parhez gaar (muttaqi) ka noor hota hai, bus kisi ka zahir hota hai aur kisi na naheen hota.

wajd moqoof hai warid par

wajd moqoof hai warid par aur baghair warid k wajd taari karna nihayat darjay ka tasanno hai. (yani jesay aksar log mehfil munaqqid kar lee aur kharay ho gaey, aur jhoom rahay hain, to ye to intehai darjay ki banawat hai. kyoon k admi wajd se jhoomta hai aur wajd jab ata hai jab k dil par koi haal warid hua ho.)

hazrat thanvi r.a. ne farmaya k "sahib-e-maqam ka warid qabil-e-ittiba ho sakta hai" har sahib-e-haal ka warid moatabar naheen k us ki ittiba kar lee jaey

tamam nekyon ki jar zohd hai

tamam nekyon ki jar zohd hai (zohd yani dunia se be-raghbati ho jana). jab zohd hasil ho jaey ga to ghina hasil ho jaey ga. (yani maaldari ho gee to nuqsan naheen de gee aur faqr ho ga to mayoos naheen ho ga), dono soorton may dil mustaghni rahay ga.

muttaqi ko bhee maut ka khof hota hai

muttaqi ko bhee maut ka khof hota hai aur dunia daar ko bhee maut ka khof hota hai. lekin farq yeh hai k dunia-daar k khof may wehshat hoti hai aur muttaqi k khof may umeed bhee ho gee. kyoon k neki may khasiat umeed ki hai aur gunah may khasiat na-umeedi ki hai. gunah se bad-bakhti ki waja may bhee yehi nukta hai k gunahon ka azab ye hota hai k admi ALLAH se mayoos ho jata hai jo k kufr tak le jata hai

zahiri aur batini shahadat talab karo

zahiri aitibar se bhee shahadat talab karo aur batini aitibaar se bhee shahadat ki dua maango. batini shahadat ye hai k apni har haram khuahish ka khoon kar dena, apnay nafs ko maar dena. batini shahadat wala siddique hota hai.

tum insan bun jaao, aadmi tumharay paas khud aaingay

Hazrat thanvi r.a. ne farmaya k tum insan bun jaao, aadmi tumharay paas khud aaingay. jab k hum batini aitibaar se janwar k janwar he hain

Jan de kar ALLAH tala ki qadar-dani dekho

ALLAH tala par jaan de kar dekho k wo kitnay qadar-daan hain. apnay gunahon par khizaan laao phir dekho ALLAH tum par kitni baharain lata hai.

Mukhlisi ka mayaar

apni qeemat khud mat lagao k mai bohat mukhlis hoon. mukhlisi ka pata imtihan k waqt chalta hai. jo badal garajtay hain barastay naheen hain. lihaza ALLAH tala k samnay ajzi ikhtiar karo aur ro ro kar maqbooliat, ikhlas aur istiqamat maango. Ehliat to kisi may bhee naheen hoti tu he paida farmata hai. Ay ALLAH tu to kareem hai, ay ALLAH meri jaan ka bhee soda kar leejye. humaray under na to ehliat hai, na quwat hai, na koi saman hai, bus tere he karam ka aasra hai. in khotay sikkon ko bhee kharay sikkon k sath qubool farma leejye. apnay paak bandon k sath un k sadqay humain bhee qubool farma leejye.

Dua

Ay ALLAH meri kashti paar laga de, toofan may meri kashti phansi hui hai aur dagmaga rahi hai aur toofan bhee tez se tez tar hota ja raha hai aur mera dil dhak dhak kar raha hai. ay ALLAH mai to banda hoon tera aur tu ne khud he farmaya hai tum zaeef ho. aur tu zaeefon ka malja-o-mola hai. Ay ALLAH mai to kamzor hoon aur taqat-war to tu hai. mera imtihan na leejye warna mai yaqeenan gir jaoonga. meri is tarha hifazat farmaye jis tarha maa hifazat karti hai apnay chhotay bachay ki.

naik sohbat may jab jata hai to hilm paida hota hai

naik sohbat may jab jata hai to hilm paida hota hai. naik sohbat k baghair sabr paida naheen hota.

kaar-e-deen batareeq-e-deen ho

Hazrat Shah Abrar-ul-Haq sb. r.a. ne farmaya k "kaar-e-deen batareeq-e-deen ho" aur farmaya k "Nakeer bila tehqeer ho". Hazrat Thanvi r.a. ne farmaya k "Ghuloo k sath dawat denay may samnay walay ko gharz ka shubha ho sakta hai" Aur Quran pak may bhee sarahat se jagah jagah aya hai "Ay Nabi Alaihissalam aap is k darpay na hon k in ko hidayat ho he jaey"

nafs-e-ammara, nafs-e-lawwama, nafs-e-mutmainna, nafs-e-raazia marzia

nafs-e-ammara wo hai jo bohat gunah karata hai. magar jis par ALLAH ki rehmat hoti hai wo bacha rehta hai. jab admi ko apnay gunahon par nadamat honay lagay to ab wohi nafs-e-ammara nafs-e-lawwama may badal jata hai. phir aik waqt esa ata hai k gunahon se wehshat honay lagti hai aur sirf ALLAH he ki baat aur ALLAH he ki yaad se itminan milta hai, ye alamat hai hai k ab nafs-e-mutmainna hasil ho gya. aur phir jab nafs-e-mutmainna hasil hojta hai to akhir may maut k waqt basharat dee jati hai k ay jaan ALLAH tujh se razi ho ja. bus wo nafs-e-raazia marzia ho kar ALLAH ki taraf khushi khushi jata hai

Tafweez aur bandagi

tafweez maanay apnay ko ALLAH k supurd kar dena aur tajweez yani apni raey ko baqi rakhna jo k baqa-e-nafs ki alamat hai
 
Muraqba-e-Abdia-Tafweezia:
1. Haq tala ka agar mujh par mustaqbil may koi esa tasarruf hua k jaan bhee jati rahay to khair-e-mehz ho gee yani ain rehmat ho gee.

2. Tajweez k baad agar matlooba cheez hasil ho bhee jaey to wo cheez to hasil ho jaey gee lekin qurb aur riza naheen milay gee. jis ki misaal esay he hai k namaz to parh li lekin wuzu naheen kya, yani matlooba cheez to hasil ho gai lekin riza naheen mili

3. tadabeer bhee dimaghon may wohi daltay hain. jab un ko razi kar lya jaey to tadbeer bhee esi dalaingay k jis may falah he ho gee. isi lye dua se bhee qavi tadbeer ALLAH ko razi kar lena hai.

4. jitnay bhee manafay, bhaliyaan aur maslihatain hain sub ki sub tafweez k sath juree hui hain. aur ye tafweez Haqq-ullah hai.

5. Jab insan tafweez ikhtiaar karnay lagta hai to shetan waswasa dalta hai tafweez ikhtiar na karo azmaish may par jao ge

6. Hadees pak may hai k jo taqwa ikhtiar kar le ga saray alam may kaheen bhee ho aman aur aafiat se rahay ga. is ka jawab ye hai k jis ALLAH k supurd apnay ko kar raha hai aur phir ghabra bhee raha hai to ye alamat hai k us par bharosa naheen hai. eeman wala apnay ko ALLAH k supurd kar de aur phir ALLAH usay zaya kar de esa ho he naheen sakta, darasal ye shetan ALLAH se badgumani daal raha hota hai. husn-e-zan rakhay k mai apnay ko intehai muhabbat karnay walay malik k supurd karta hoon ko mujhe zaya naheen karay ga

7. fana jo talab-e-shohrat k lye ho baqa-e-nafs ki daleel hai (yani fana is lye ikhtiar karta hai k shohrat ho jaey aur log mutawaze samjhain) aur tafweez jo rahat k lye ho darasal tajweez hai (yani apnay ko supurd is lye karta hai k rahat ho jaey to ye bhee daleel hai k abhee tak apni raey aur tajweez baqi hai).

8. Hz. Thanvi r.a. ne farmaya k "dunyavi umoor may bohat zyada inhimaak aur ehtimam khilaf-e-tafweez, khilaf-e-tawakkul aur khilaf-e-taqdeer hai". kyoon k waja ye hai k eeman-e-kamil k sath parishani jama naheen ho sakti aur ye itna ehtimam aur inhimak alamat hai k duniavi umoor may be-had parishan aur bechayn aur harees hai

9. hazrat Thanvi r.a. ne farmaya k "hain to hum banday lekin chahtay hain khudai (yani jo hum chahain wo ho). bus ALLAH ki marzi k samnay apni marzi ko fana kar do"

waswasay ka ilaj zikrullah

wasawis zakir qalb may naheen ghafil qalb may atay hain. har shakhs khoob achhi tarha janta hai k mera ALLAH tala se talluq kesa hai aur kitna mazboot hai. bus talluq ko sahee kar le to sub wasawis aur khayalaat khatam ho jaaingay. aur us ka nuskha ye hai k shaikh k bataey huay zikr ki pabandi karay. zikr se fikr ka jamood door hota hai. agar fikr jamid hai to us ko harkat may lanay k lye zikr ikhtiar karo.

zikr fikr-e-afsurda ko khushi se badal deta hai.

zikrullah se latafat k sath sath bashashat bhee ati hai. zikr daafay-e-amraz-e-jismani bhee hai aur daafay-e-amraz-e-roohani bhee hai. istiqamat k lye bhee kasrat-e-zikr he shart hai. wasawis ka aik sabab shaikh se doori bhee hota hai.

Zikrullah ka iltizam alamat hai istiqamat ki. Zikr ka nagha rooh ka faqa hai. Naghay se be-barkati ati hai. Agar nagha ho raha hai to ye khud alamat hai k ab istiqamat nahee rahi

jo amal ilm k khilaf ho alamat hai k ye ilm ikhlas se hasil naheen kya

Hazrat Thanvi r.a. ne farmaya k "jo amal ilm k khilaf ho alamat hai k ye ilm ikhlas se hasil naheen kya."

madaris ki 8 saala taleem ka hasil

madarsay may 8 saal ki taleem hasil karnay k baad agar ye socha k mai ab kuchh ho gya hoon to  kuchh bhee hasil na ho saka. jis ki misaal esi hai k chhota gadha dakhil hua tha aur bara gadha bun kar nikla. ilm ka to hasil he ye hai k ALLAH tala ki azmat se waqif ho jaey jis ki alamat ye hai k apnay ko kuchh bhee na samjhay.

Hazrat wala ne farmaya k "Darul Uloom dil k tarapnay ka naam hai, darul uloom rooh k jalnay ka naam hai"

saray ilm ka hasil ye hai k ALLAH tala ki muhabbat dil may paida ho jaey takay amal karna asan ho jaey aur ye kisi ALLAH walay ki sohbat k baghair hasil naheen ho sakta

ikhtilaf aur adawat may farq

Hazrat Thanvi r.a. k paas aik sahab aey to un se ikhtilaf bhee tha aur ikram bhee kya. to farmaya k ikhtilaf to is lye hai k kuchh be-usooli thee aur ikram is lye kya kyoon k mere mehman thay. is se pata chala k ikhtilaf to ho sakta hai magar adawat na ho, yani hudood may rahay.

Agar kisi ki aik baat se ikhtilaf ho aur us ki har baat he buree lagnay lagay to ye alamat hai adawat ki

jab mayoos ho k maqbool ho ya naheen to daman-e-mustafa thaam lo

jab esay mayoosi k khayalaat anay lagain k maqbool hoon ya naheen to foran aap sallallah-o-alaihi wasallam ka daman pakar lena, aur sunnaton par amal may lag jana. kyoon k jesay he amal karo ge to us amal se mehboob-o-maqbool ho jata hai aur mayoosi bhee door ho jaey gee.

Sunnat par amal karnay walay k 4 tareeqay se ikram kia jata hai

Hadees pak may hai k "jo meri sunnat ki hifazat karay (yani sunnat ko lazim pakar le) to ALLAH tala us ka 4 tareeqay se ikraam farmaaingay:

(1) naik logon k dilon may us ki muhabbat daal daingay
(2) bad-kaar logon k dilon may us ki haybat daal daingay
(3) us ko farakhi-e-rizq naseeb farmaaingay
(4) deen may pukhtigi naseeb farmaaingay"

waawaila qabl az marg

ye sochna k jihad may maloom naheen sabit qadam rahoonga ya naheen, ya qayd na ho jaoon, ya zakhmi na ho jaaoon, ya quwat ho ya na ho, ya mustaqbil may gunah may mubtila na ho jaaoon waghaira, in sub mustaqbil ki fikr ko Hazrat thanvi r.a. ne farmaya k "waawaila qabl az marg hai". yani maut aai naheen aur us se pehlay he waawaila machana shuru kar dia. mustaqbil ki fikr may na paray warna ta-zeest is se nijaat mushkil hai. is fikr may parnay se shetan mayoosi may dalay ga aur amal ki himmat khatam kar de ga. mustaqil husn-e-zan rakhna aik mustaqil ibadat hai

jo aghaz he may fikr-e-anjam hai...tera ishq shayad abhee khaam hai.

Jihad k lye tabai aamaadgi aur riza wajib naheen sirf aqli riza chahye

Hazrat Thanvi r.a. ne farmaya k tabai aamaadgi aur riza jihad k lye wajib naheen kyoon k ye ikhtiaar may naheen sirf aqli riza wajib hai jo ikhtiari hai, aur wo ye hai k agar shariat ka hukum ho to moqa-e-qitaal may hazir rahaingay, chahay kesi he wehshat aur dehshat ho tab bhee wahan se na hataingay, khuaa jaan he jati rahay, to bus ada-e-wajib k lye itna he azm kafi hai.

Dua dastak ki tarha hai aur musalsal dastak se darwaza khul he jata hai

Dua dastak ki tarha hai... aur musalsal dastak se darwaza khul he jata hai

kholain ya na wo kholain dar
tujh ko hai kyoon is ki fikr
tu to bus apna kaam kar
yani sada lagaey ja
bethay gar aram se
rahaingay par kya kaam k
go na nikal sakay magar
pinjray may pharparaey ja

kya ye muhabbat ki alamat naheen k "agar de naheen rahay to janay bhee to naheen de rahay" kyoon k wo jantay hain k de dya to bhag jaey ga aur janay is lye naheen de rahay k is ka maangna, is ka rona ALLAH ko pasand aa gya hai.

umer bhar tarapna hai is mauj-e-muztar ko
k samadar ko pasand aa gya hai raqs is ka

ALLAH he ki dee hui jaan ALLAH tala he se bachana be-wafai hai

ALLAH ki dee hui jaan ALLAH tala he se bachana be-wafai hai. Hazrat wala ne farmaya k "ALLAH k rastay may apnay aazaa ko mazboot rakho".

jan dee, dee hui usi ki thee...haq to ye hai k haq ada na ho saka

ALLAH ka hukum anay k baad jo apni jaan ko ALLAH he se bachaey to phir us ko ghut ghut kar zillat ki maut ati hai

duaain qubool na honay ki waja

jab ALLAH ki bargah may tumhari duaain qubool na hon to apni Ghiza aur Guftugu ka ehtisab karo

(imam ghazali r.a.)

ibadaat se qurb milta hai jab k gunah chhornay se riza milti hai

ibadaat se qurb milta hai jab k gunah chhornay se riza milti hai. qurb riza k sath ho to matloob hai. warna qurb to badshah k darbar may shehzaday ko bhee hota hai aaur mujrimeen ko bhee. lekin aik ko badshah ki riza hasil hai aik ko naheen. shetan ne bhee ibadaat bohat keen jis se muqarrab bhee ho gya lekin maqbool naheen hua, aur ALLAH ki riza hasil na hui. ibadat karna ALLAH ki muhabbat ka haq hai aur gunah chhorna ALLAH ki azmat ka haq hai.

meri talab bhee un k karam he ka sadqa hai

wo mujhe yad gar naheen kartay
yad un ki imujhe naheen aati

Ay ALLAH ye aap he k karam ka to sadqa hai, aap he to humain yaad kar rahay hain jo humain aap ko yad karnay ki tofeeq ho rahi hai.

agar koi kisi ko koi hunar sikhaey aur wo shakhs seekhnay k baad kahay k ye to mujhe ata tha aur is may kya mushkil hai to sikhanay wala kahay ga k kesay na-shukra admi hai aur ainda koi nai baat naheen bataey ga. isi tarha jo banda nekyon ko apna kamal samajhta hai us se barh kar na-shukra aur koi naheen. lihaza nekyon ko ALLAH ki ata samajh kar shukar karta rahay.
 
chhota bacha jis ko pencil bhee pakarna naheen ati, baap us k hath may pencil pakra kar us ka hath apnay hath se pakar leta hai aur likhwata hai ALIF, aur phir khud he us ko shabashi bhee deta hai, aur bacha bhee khush hota hai k mai ne likha, halan k wo to baap ne apnay hath se pakar kar likhwaya tha warna bachay ko to pencil bhee chalana nahee ati thee

Nadamat hona alamat hai k ashiq-e-khudawandi hai

Hazrat wala damat barkatuhum ne farmaya k "Nadamat hona alamat hai k ashiq-e-khudawandi hai"

Mujahiday se jism ko to takleef hoti hai lekin rooh may noor paida hota hai

Hazrat Thanvi r.a. ne farmaya k "Mujahiday se jism ko to takleef hoti hai lekin rooh may noor paida hota hai" bohat se log ye ishkaal kartay hain k Quran pak may to hai k "dilon ka itminan ALLAH he k zikr may hai" jab k bohat se ehlullah ko bhee parishaniaan ati hain. to hazrat wala ne is ka jawab dia k "jism may to takleef may ho sakta hai lekin rooh itminan se hoti hai, dil parishan naheen hota"

hazz-e-nafs ka nuqta-e-aghaz bod-anil-haq ka nuqta-e-aghaz hai

Hazrat thanvi r.a. ne farmaya k "hazz-e-nafs ka nuqta-e-aghaz bod-anil-haq ka nuqta-e-aghaz hai"

haz kehtay hain lazzat ko
hazz-e-nafs yani nafs ki lazzat
boad-anil-haq = ALLAH se doori

yani nafs jis waqt lazzat lena shuru karta hai to bus wo ALLAH se doori ka nuqta-e-aghaz hota hai. misal k taur pay kisi haseen ka khayal sochna shuru kya, ya apnay ko achha samajhna shuru kya, ya kisi k baray may buray khayal paka raha hai, ya hisr-o-hasad k khayalat sochna shuru kye, to bus foran usi waqt ALLAH tala se doori ka zero point hai.

Roohani Rizq aur Jismani Rizq

ALLAH tala RUB hain jis k maanay hain palnay wala. to jis tarha ALLAH tala jismani rizq detay hain isi tarha roohani rizq bhee ponhchatay hain. hadees pak may hai k insan jab tak apna rizq mukammal naheen kar le ga to us waqt tak maut naheen aey gee. hazrat wala ne farmaya k is may jismani k k sath roohani rizq bhee shamil hai. jis ka roohani rizq jahan likha hota hai waheen ponhcha dya jata hai. alam-e-arwah may jin roohon ki munasibat thee dunia may wo jama kar dee jati hain.

Hadees pak ki dua hai na k "allahumma arinal haqqa haqqaoon warzuqnat tiba'aa, wa-arinal baatilaa baatila warzuqnajtinaba...to hazrat wala ne farmaya k is may haq ka ittiba aur batil se ijtinab ko warzuqna se tabeer kya...yani haq ka ittiba aur batil se ijtinab ko hamara rizq bana de...aur hadees may hai k jab tak rizq mukammal naheen hoga us waqt tak maut naheen aey gee...yani ay ALLAH maut jab tak na aey jab tak k hum apna roohani rizq mukammal na kar lain yani haq ka ittiba aur batil se ijtinab"

khof hota hai zoaf-e-qalb se, aur zoaf-e-qalb hota hai gunah se

Hazrat thanvi r.a. ne farmaya k "khof hota hai zoaf-e-qalb se, aur zoaf-e-qalb hota hai maasiat (gunah) se"

bohat se sahaba duplay patlay thay, kamzor thay, lekin choon k taqwa se rehtay thay aur gunah naheen kartay thay jabhee dil mazboot tha, bari bari taqaton se takra jatay thay. ye eeman he ki quwat thee. kyoon k gunah se dil kamzor ho jata hai aur dil may andheray aa jatay hain, jis ki waja se buzdili hoti hai aur wasawis atay hain kyoon k andheray may he waswasay atay hain k kaheen gir na jaoon, koi janwar na kaat le, jab k roshni may esa waswasa naheen ata. kyoon k sub saaf dikhta hai. isi lye jihad may kasrat-e-zikr ki takeed ki jati hai takay dil se andheray bhag jaain aur isteqamat qaaim rahay

ALLAH par yaqeen na hona

1. Hazrat Thanvi r.a. farmtay hain k "hamara to ALLAH tala se esa talluq ho gya hai, jesay goya k un k ikhtiyar may nauzubillah kuchh hai he naheen."

parishani may shikwa shikayat na karay

aik buzurg farmtay hain k parishani ka tazkira kartay rehnay se barh jati hai, khamosh honay se kam ho jati hai, sabr karnay se khatam ho jati hai aur shukr karnay se khushi may tabdeel ho jati hai

ALLAH ki muhabbat ki masti jab tak he hai jab tak k asbab-e-gunah se door hai

ALLAH tala ki muhabbat ki mastiaan jab tak he hain jab tak k asbab-e-gunah se door hai, jesay he asbab-e-gunah qareeb aey to sub mastiaan khatam. sohbat-e-ehlullah se admi ki rooh zinda rehti hai aur nafs mita rehta hai. nafs marta naheen hai, haan kamzor aur sard par jata hai, lekin asbab k qareeb atay he is may phir se garmi aa jati hai. molana roomi r.a. farmatay hain k machhli ko pani se nikalo to thori der tak to tarapti hai lekin phir thori der k baad wo tarapna bhee khatam ho jata hai aur mar jati hai. isi tarha ALLAH walon se door zyada din tak agar door huay to thoray din to tarpo ge phir wo tarap bhee khatam ho jaey gee aur eemani maut waqay honay ka khadsha hai

ALLAH tala ki ashad muhabbat

"dikha jalwa wohi ghaarat gar-e-jaan-e-hazeen jalwa!"

yani ay ALLAH dikha wo tajalli k jo meri ghamgeen jaan ko must kar de, mere dil k tukray tukray ho kar under tak wo tajalli dakhil ho jaey jesay toor pahar tukray tukray hua to tajalli zarray zarray may dakhil ho gai thee. Ay ALLAH apni esi koi nishani dikhla de k hamara eeman barh jaey aur phir hum koi gunah na kar sakain. Ay aram-e-jaan-e-be-qararaan to hamaray dil ko apni muhabbat aur yaad se bhar, dil k zarray zarray may tajalli ko dakhil kar de aur us ka tahammul bhee de jis ko ALLAH tala apna banatay hain phir us ko dunia ki kisi cheez se sukoon naheen milta, us ko to sirf ALLAH he ki yad se sukoon milta hai, jesay bachay se maa door ho jaey to us k samnay lakh khilonay la kar rakh do wo to kehta hai k mujhe kuchh achha naheen lag raha mujhe to meri amma chahye. ALLAH tala humain apni esi muhabbat mehz apnay karam se naseeb farma dain.

Hazrat wala ka sher hai k:

wo mujhe yad gar naheen kartay
yad un ki mujhe naheen aati

yani ay ALLAH jab aap mujhe yaad kartay hain jabhee mujhe aap ki yaad aati hai

bhanwain nochnay wali aur nuchwanay walion par lanat aai hai

Hadees pak may bhanwain nochnay wali aur nuchwanay walion par lanat aai hai. aur lanat k meanings hain ALLAH ki rehmat se doori. lihaza humain apnay ghar ki khawateen ko is cheez se rokna chahye takay is laanati kaam se bachain. aurtain kehti hain k hum to shohron ko dikhanay k lye banwatay hain, to un k shohron ko chahye k un se ye kahain k humain to tum bhanwain banwaey baghair he achhi lagti ho. ye bohat lanati amal hai is ka humain aur khawateen ko sakhti se notice lena chahye.

is zamanay may sohbat-e-ehlullah farz-e-ain hai

Hazrat Thanvi r.a. ne farmaya k "is zamanay may sohbat-e-ehlullah farz-e-ain hai". Hindustan may jis zamanay may irtidad (deen se phir janay) ki hawa chali to us waqt Hazrat Thanvi r.a. ne farmaya tha k "musalmano ko chahye apnay mojooda eeman par shukar ada karain." ye eeman ki hifazat k nuskhon may se hai aur husn-e-khatima ka bhee nuskha hai. kyoon k Quran pak may hai k tum shukr karo ge to hum aur daingay. lihaza eeman par shukr se eeman aur ghatay ga aur soo-e-khatima se door ho ga.

safar may 2 cheezain ghar par chhor kar aey: Raahat aur Ghussa

Hazrat thanvi r.a. ne farmaya k "safar may 2 cheezain ghar par chhor kar aey: aik Raahat aur doosra ghussa"

shukr karna tawazo ki alamat hai

Hazrat bayazeed bustami r.a. aik dafa kaheen jarahay thay to rastay may aik shakhs ne ooper se raakh un k ooper phaink dee. to unhon ne farmaya ALHAMDULILLAH!. aik khadim un k sath tha bola k hazrat yahan shukr kyoon kya, takleef par to inna lillah parhna chahye tha. to Hazrat ba-yazeed bustami r.a. ne farmaya k "jo sir aag barsanay k qabil tha us par sirf raakh barsai gai to kya mai shukr na karoon" is waqiay se ye pata chala k in buzurgon ki fanaiyat ka kya alam tha k apnay ko kuchh naheen samajhtay thay kisi qabil naheen samajhtay thay, aur shukr kya, kyoon k shukr aur kibr may tazad hai. shukr may nazar ALLAH ki taraf hoti hai k jo mila wo aap ki ata hai warna is ka bhee mustahiq bhee na tha, lekin mutakkabir ki nazaar apnay kamal par hoti hai k jo kuchh hua mera kamal hai, aur jo mila us se zyada ka apnay ko mustahiq samajhta hai isi lye shukar bhee naheen karta. isi lye har mutakabbir na-shukra hota hai aur shakir mutakabbir naheen ho sakta, kyoon k nemat ko apna kamal samajh he nahee raha, ALLAH ki ata samajh raha hai jabhee to shukr kar raha hai. to ba-yazeed bustami jo shukr kar rahay hain to is pata chalta hai k in buzurgon may tawazo ka kya alam tha k apnay ko kisi izzat-o- ikram ka mustahiq naheen samajhtay balkay jo raakh barsi to ALHAMDULILLAH keh rahay hain k mai to aag barsanay k qabil tha, raakh baras gai to is par bhee shukr hai.

isi tarha aik dafa Hazrat Junaid baghdadi masjid may thay ailan hua k jo is masjid may sub se zyada gunehgar hai wo bahir nikal jaey, to Hazrat junaid baghdadi sub se pehlay bahir nikal k aagey. to kisi ne un k shaikh shibli se ja kar ye maajra bayan kya to Hazrat shibli ne sard aah bhari aur farmaya k "aah! us ki isi ada ne to us ko junaid bana dya"

muntazir-e-salam rehna bhee alamat-e-takabbur hai

1. kisi soofi (salik) ko kisi ne kuchh keh dya to foran ghussa ajaey to ye alamat-e-takabbur hai. yani agar haq baat kahay to na manay aur ghussa ajaey aur agar na-haq bhee ho to tab bhee bardasht karay, kyoon k ye to haq hai na k "mai tamam musalmano se kam tar hoon fil haal aur tamam kafiron aur janwaron se kam tar hoon fil-ma'aal (yani anjam k aitibar se)". to jab apnay ko kamtar har aik se samajhta hai to ghussa kyoon aa raha hai. na-haq baat par ghussa tab'an aa sakta hai lekin us ghussay ko pee jana he to kamal hai. jesay aik buzurg ko kisi hasid gustakh ne kaha k aap "harami hain" yani haram ki aulad hain. to un buzurg ne is ko maslay k tor par lya aur farmaya k bhai "mere walid k nikah k gawah ab bhee mojood hain mai un se tumhain milwa sakta hoon"

2. muntazir-e-salam rehna bhee alamat-e-takabbur hai

3. jab nisbat-e-shaikh ata ho jati hai to foran usi waqt nisbat maa'ALLAH bhee ata ho jati hai. yani shaikh k ghar walo aur us se nisbat rakhnay walay har shakhs ka aqlan ehtram karnay lagay to phir nisbat maa'ALLAH ata honay may der naheen lagti

kibr ki tareef

kibr ki tareef hadees pak may ye bayan ki hai k "jo haq baat ko na manay aur logo ko haqeer janay" yani haq baat ko na mannay wala mutakabbir hai

ittefaq ki jar tawazo hai

Hazrat haji imdadullah mahajir makki r.a. ne farmaya k "ittifaq ki jar tawazo hai" yani agar har banday may tawazo ho gee to apas may ittifaq aur ittihad ho ga, lekin agar har banda apni akar aur takabbur may ho ga to kya khak ittifaq ho ga

khushu aur istaghraq may farq

log chahtay hain k namaz may mustaghraq ho jain, namaz may shariat ne khushu ka hukum dia hai na k istaghraq ka. khushu aur istaghraq may farq hai. khushu ikhtiari hai jab k istaghraq (gharq ho jana) ghair ikhtiari hai. agar istaghraq ka hukum hota to shariat ka wo hukum kesay poora hota k agar admi namaz may ho aur kisi ki jan khatray may ho to namaz tor kar pehlay us ki jan bachaey

tableegh naam hai laganay ka aur laga wohi sakta hai jis k khud lagi ho

Tableegh naam hai laganay ka aur laga wohi sakta hai jis k khud lagi hui ho. Hazrat thanvi r.a. ne farmaya k "unwanaat ka asaar may bara dakhal hai" yani agar makhlooq ka dard dil may ho ga to un ki zaroorat aur kefiaat ko dekhtay huay hikmat k sath apni dawat ka unwaan qaim karay ga, kyoon k unwan ka bohat asar hota hai. ghisay pitay unwaanaat se aksar dawat be-asar ho jati hai.

Hazrat Shah Abrar-ul-Haq sb. r.a. ne farmaya k "kaar-e-deen batareeq-e-deen ho" aur farmaya k "Nakeer bila tehqeer ho". Hazrat Thanvi r.a. ne farmaya k "Ghuloo k sath dawat denay may samnay walay ko gharz ka shubha ho sakta hai" Aur Quran pak may bhee sarahat se jagah jagah aya hai "Ay Nabi Alaihissalam aap is k darpay na hon k in ko hidayat ho he jaey"

jesay aik sahab ko maut se bohat dar lagta tha to Hazrat wala ne ye unwan qaim farmaya k "k is dunia ki aarzi zindagi akhirat ki daimi zindagi se musafa karnay wali hai" ab dekhain is may maut k bajaey zindagi ka tazkara bhee ho gya aur samajh bhee agya.

hadees pak mazmoon hai k "jo logo k halaat ko naheen janta wo jahil hai" yani sub ko aik he lakri se hankna hikmat k khilaf hai.

isi tarha Europe may hazrat wala ne akhirat k tazkaray ka ye unwan qaim kya k "pardes may tazkira-e-watan" ab kyoon k jo log wahan par reh rahay thay un ko jab watan ka tazkira milay ga to watan ki muhabbat aur yad aey gee aur yahan watan se murad hazrat wala ki watan-e-akhirat tha. logo k mizajon ki shariat ki hudood may riaayat rakhna Aap sallallah-o-alaihi wasallam ki sunnat thee

ronay wala mehroom naheen rehta, mangnay wala mardood naheen hota

Hazrat thanvi r.a. ne farmaya k "jis shakhs ko jis cheez ka khof ho ga to maut k waqt us cheez se us ki hifazat ki jaey gee aur jis cheez ki umeed ho gee wo us ko ata kar dee jaey gee"
aik buzurg farmatay hain k "mangnay wala mehroom naheen rehta aur ronay wala mardood aur zaya naheen hota"

rona mubarak to hai lekin ye rona ALLAH k k lye ho, khali ronay se bhee kaam naheen chalta jab tak k himmat kar k amal na karay.

ronay walay to moharram may bohat rotay hain
kya faqat ashk bahanay he se kaam chalta hai?

maal de kar jaan bacha lena aur jaan de kar eemaan bacha lena

Hazrat wala ne aik usool taleem farmaya k "maal de kar jaan bacha lena aur jaan de kar eemaan bacha lena" Hazrat thanvi r.a. ne bhee aik sher usool k tor par taleem farmaya k

jab do moozion may ho khat pat
to apnay bachnay ki fikr kar jhat pat

phir farmaya k sukoot aur sukoon k sath alaihida ho jaey

sohbat ka asar matboo par naheen tabay par hota hai

sohbat ka asar matboo par naheen tabay par hota hai. tabay yani jo logo k ma-teht ho aur matboo yani jis k log tabay hon. isi lye Hazrat thanvi r.a. ne farmaya k duniadaron se jab milo to matboo ban kar na milo tabay ban kar milo, warna un ki sohbat se mutassir ho jao ge.

- sara jahan khilaf ho parwa na chahye
pesh-e-nazar to marzi-e-janana chahye
phir us nazar se jaan k ye kar faisla
kya kya to karna chahye aur kya kya na chahye

- jahan jatay hain hum tera fasana chher detay hain
koi mehfil ho tera rang-e-mehfil dekh letay hain

awam ko gunah yad karna mufeed aur salikeen ko yaad karna muzir hai

Hazrat Thanvi r.a. ne aik tehqeeq bayan farmai k "salikeen k lye apnay puranay gunahon ko sochna muzir hai, jab k awam k lye mufeed hai, kyoon awam to jitna sochain us se tawajjo ilallah he ho gee, lekin salikeen jab sochtay hain to sheta mayoosi ki taraf le jata hai. phir in gunahon ki bhee 2 qismain hain:
1. jahi
2. bahi

Salikeen ho ya awam jahi (ghussa, kibr, ujub, bad-gumani, hasad, gheebat etc.) gunahon ko to jitna zyada sochain ye muzir naheen kyoon k is se apni himaqat he mustehzar ho gee, lekin bahi (shehwani) gunahon  ko agar zyada sochay ga to nafs mazay lenay lagay ga aur phir gunah may mubtila honay ka andesha hai. lihaza jab banda toba kar chuka to ab jab bahi gunahon ka agar khayal aey sheta k chakkar may na aey aur us taraf tawajjo na karay, kyoon k ALLAH tala ki maghfirat aur rehmat par yaqeen rakhay"

nekiaan yad rehti hain gunah yaad naheen rehtay

Hazrat zulfiqar naqshbandi sb. ajeeb baat farmatay hain k "humain apni purani purani nekiaan to khoob yad rehti hai lekin apni buraiyaan bhool jatay hain, logo ki chand baaton par foran phool jatay hain"

maloomaat aur mamoolaat may farq / maqbooliat aur qabliat may farq

Hazrat thanvi r.a. ne farmaya k "waqai jab tak nafs naheen mit'ta to apni he maloomaat mamoolaat may tabdeel naheen hoteen". ilm se kya hota hai, ilm to shetan k paas bhee bohat hai, ALLAH se maqbooliat maango aur maqbooliat ka rasta ittiba-e-sunnat hai, gunah chhoray aur amaal ki pabandi karay. Hazrat wala ne farmaya k ilm k lye to taqwa shart naheen hai, lekin taqwa k lye sohbat-e-ehlullah shart hai. kyoon k ilm mat barkat 2 cheezon se ati hai:
1. taqwa
2. adab
boaht se log qabil to hotay hain maqbool naheen hotay aur bohat se maqbool hotay hain lekin qabil naheen hotay aur bazay qabil bhee hotay hain aur maqbool bhee hotay hain

Namaz may khushu na ho na bhee to aik gunah hai

Namaz may khushu na ho na bhee to aik gunah hai. Hazrat Thanvi r.a. ne farmaya k khushu naam hai harkat-e-fikria k inqita ka. Yani jesay he namaz may fikr muntashir ho foran us soch ko munqata kar de, bus khushu hasil ho gya. Jesay k namaz may jesay he khayal kahee chala gya to foran halka sa ye soch le k "bhai namaz may khushu na hona bhee to gunah hai" inshaALLAH chand din
mashq se namaz may khushu hasil ho jaey ga

Jab toheed kamil ho jati hai to sabr bhee kamil ho jata hai

1. Jab toheed kamil ho jati hai to sabr bhee kamil ho jata hai. ya yoon keh lo k jab sabr kamil ho jata hai to toheed bhee kamil ho jati hai

2. Quran pak ki ayat ka mazmoon hai k "jo ALLAH par bharosa kar leta hai to ALLAH tala us k lye kafi ho jata hai"

3. Quran pak ki ayat ka mazmoon hai k "jab azm kar lo to phir ALLAH par bharosa rakho"

4. logo k hath may jo kuchh hai us se apnay ko mayoos kar lo, ye hai toheed

na de sakeen lalach tujh ko sikkon ki jhankarain
tere dast-e-tawakkul may hain istaghna ki talwarain

faryad-e-muztarib aur dil-e-shikista

1. Hamara markaz-e-umeed-e-rehmat aap ka dar hai
kisi k dar pay to ya-RUB ye peshani naheen jati
kabhee mushkil may bhee parta hai akhtar to bihamdillah
khuda k fazl se ummeed-e-pinhani naheen jati

2. agarchay pur-khata hai par kahan jaey tera banda
teray dar par tera banda ba-umeed-e-karam aya

3. Haq paraston ki agar ki tu ne diljoi naheen
tana daingay but k muslim ka khuda koi naheen

4. kya nazar na mujh par dali jaey gee
kya meri faryad khali jaey gee

5. mayoos na hon ehl-e-zameen apni khata se
taqdeer badal jati hai muztar ki dua se

iraday aur tamanna may farq

iraday aur tamanna may farq hai. iraday may saee yani koshish bhee karta hai. ALLAH k rastay may admi irada karay, mehz tamanna se kaam naheen chalta aur nijat nahee milti

zahanat aur aqalmandi may farq

kafir zaheen to hotay hain magar aqalmand naheen. zahanat aur aqalmandi may farq hai. aqalmand anjam been hota hai. Hazrat thanvi r.a. se kisi ne kaha k Gandhi jee bohat aqalmand hain poora Quran parha hai aur naat bhee kahi hai. Hazrat Thanvi r.a. ne farmaya k aqalmand naheen balkay intehai chalak admi hai, aqalmand hota to eeman lata

ALLAH tala k rastay may ghair mukhlis naheen chal sakta

ALLAH tala ne apnay rastay ko khooni kar k dikhaya (k raah-e-taqwa may ye ye gham atay hain)m us ki waja ye hai k ghair mukhlis aur mukhlis logo may farq ho jaey, ghair mukhlis log is rastay may qadam na rakhain aur un par hujjat tamam ho jaey aur ALLAH k ashiq aur mukhlis logo ki tareekh raqam ho jaey. isi lye ikhlas se bhee ooncha aik maqam hai aur wo hai riza-bil-qaza yani ALLAH ki riza par razi rehna

jo aghaz he may fikr-e-anjam hai
tera ishq shayad abhee khaam hai

masaaib may ye sochay k ye haalaat mutanabbeh karnay k lye aey hain

masaib aur mushkil halaat may ye na sochay k ye mere gunahon ki saza hai, k ye ALLAH tala se aik tarha ka soo-e-zan hai. balkay ye sochay k ye halaat mujhe mutanabbeh karnay k lye bhejay gaey hain. shetan saza k khof dila kar ALLAH se bad-guman kara kar ALLAH se mayoos deta hai. jab k agar ye sochay k mutanabbeh karnay k lye ye halaat aey hain to islah ki taraf tawajjo bhee ho gee aur rujoo ilallah bhee ho ga

nisbat maa'ALLAH ki alaamaat

nisbat maa'ALLAH k lawazim may se hai:

1. sahoolat-e-itaa'at (yani gunah se bachna aur naik amaal karna asan ho jaey)
2. huzoor-e-daaim (har waqt ALLAH ka istehzar rehna)

aksar dawam-e-zikr hasil honay se log ye samajhtay hain k sahib-e-nisbat ho gaey, halan k nisbat moqoof hai gunah chhornay par.

har waqt ALLAH tala ka istehzar to batil firqay walon ko bhee mashq karnay se hasil ho jata hai. ye mustaqil istehzar nisbat maa'ALLAH naheen balkay malaka-e-yad dasht hai. (yani yaad rehnay ka malaka). malaka-e-yaaddasht k sath gunah jama ho sakta hai lekin nisbat maa'ALLAH k sath gunah jama naheen ho sakta. isi lye khali istehzar kafi naheen, gunah chhorna asal hai.

sahib-e-nisbat ho janay k baad ye naheen k gunah he naheen ho sakta. balkay matlab ye hai k awwal to aulia ALLAH masoom to naheen hotay albatta mehfooz kar dye jatay hain lekin agar gunah ho bhee gya to gunah par dawam naheen reh sakta yani gunah par qaaim naheen rahay ga, jald tofeeq-e-toba naseeb ho jaey gee. Hazrat wala ne farmaya k Arif Billah se bhee zina ho sakta hai lekin phir us ki toba bhee Arif ki toba ho gee, yani ro ro kar sajda gaah ko tar kar de aur arsh ko hila de ga, aur jab tak ro ro kar mana naheen le ga jab tak chayn se naheen bethay ga.

nisbat isi ka naam hai, nisbat isi ka naam
un ki gali se aap nikalnay na paye

fitno k waqt haq ko pehchannay ka tareeqa

imam ibn-e-temia ne farmaya k jab haq wazay na ho raha ho to haq ko pehchannay ki alamaat may se aik ye bhee hai k sari dunia k teeron ka rukh dekh le kis taraf hain. Quran pak may Allah tala ne fermaya k "beshak ALLAH k nazdeek deen sirf islam he hai". bohat se log kehtay hain k "inshaALLAH islam ghalib ho kar rahay ga" ulema ne ye farmaya hai k "yahan inshaALLAH kehna durust naheen. Islam ka to Aap sallallah-o-alaihi wasallam ne pehlay he se bata dya hai k ghalib ho kar rahay ga" lihaza ye kahay k "beshak islam ghalib ho kar rahay ga"

taweez may aik tarha ka istaghna hai

Taweez may aik tarha ka istaghna hai. log chahtay hain k taweez k baad bus kaam hona he chahye aur jab na ho to parishan hotay hain. isi lye sunnat tareeqa ye hai k salat-ul-hajaat parh kar dua karay. dua se aajzi paida hoti hai k ya ALLAH mera ye kaam kar dain aur taweez may admi tawaqqo le kar ata hai k kaam hona he chahye jis se phir dua naheen karta aur jo k istaghna ki
soorat hai. sahab galay may taweez naheen talwarain latkaya kartay thay. hamaray akabireen to is lye taweez de detay hain k log amal k lye tayyar hotay naheen bus taweez mangtay hain aur agar na milay to jali peeron k paas phansnay ka andesha hota hai. isi lye sunnat amal salat-ul-hajaat aur dua he hai jo aaj musalmano ne chhor dee hai.

hasad ki taareef

Hasad ki tareef:

1. ALLAH ki taqseem par razi na rehna (yani us ko dya mujhe kyoon na dya ya us ko itna dya mujhe itna kyoon na dya)

2. kisi ko koi nemat hasil ho to us k zawal ki tamanna karna ye bhee hasad hai

3. kisi k aish-o-aram ko dekh kar dil ko sadma, ranj aur jalan hona aur us ki nemat k zawal ki tamanna karna, ya us k aish-o-aram k khatam ho janay par khush hona bhee hasad hai.

4. kisi ki nemat dekh kar dil may ye tamanna karna k mujhe bhee mil jaey to is may harj naheen ye "rashk" ya "ghibta" kehlata hai

5. hazrat thanvi r.a. ne farmaya k "kisi dost ya dushman k zawal-e-nemat se under se dil khush ho to agarchay bazahir is se izhar-e-afsos bhee kya aur aqlan hasad ko bura bhee janay, phir bhee choon k under ki khushi ghair ikhtiari honay se gunah bhee naheen lekin haalat nuqs ki hai, is ka ilaj batakalluf karay"

Hasad ka ilaj

Hasad k ilaj:

1. jis se hasad ho us ko salam may pehl karay
2. safar par jab jaey to mulaqat kar k jaey
3. safar se wapsi par hadya laey, balkay aksar hadya deta rahay
4. apni majalis may us ki tareef karay
5. us ki koi burai karay to sakhti se mana kar de aur himayat karay
6. us k lye khoob dua karay
7. kabhee kabhee us ki dawat kar de (nashta, chaey, khana) jo bhee hasb-e-istitaa`at ho

8. inshaALLAH is par amal karnay se hasad ka ilaj ho jaey ga aur agar ilaj na kya to sub nekiaan zaya ho jaingee. kyoon k hadees pak may hai k hasad nekion ko is tarha kha jata hai jesay aag sookhi lakrion ko jala kar rakh kar deti hai"

9. ye sher bhee hasad k ilaj k lye mufeed hai:
Hasad ki aag may kyoon jal rahay ho
jehannum ki taraf kyoon chal rahay ho
Khuda k faislay se kyoon ho naraz
kaf-e-afsos kyoon mal rahay ho

maal aur jaan may barkat ka nuskha

maal ALLAH ki raah may lagta hai to wo maal mehfooz ho jata hai aur barkati ho jata hai. jesay jis maal par zakaat de dee jati hai to baqi maal pak aur mehfooz bhee ho jata hai aur barkat alag ati hai. isi tarha jab jaan ALLAH ki raah may lagti hai to jan bhee mehfooz ho jati hai. aur jan may barkat ati hai. ALLAH ki ata ki hui jan ALLAH he se bachai to esi jaan par halakat ati hai aur phir ghut ghut kar zillat ki maut marta hai. isi lye Hazrat wala ne Hazrat Meer sahab ko jo aik dafa takya rakh baith rahay thay zameen par takay zameen na chubhay to farmaya k "Meer sahab ALLAH k rastay may apnay aazaa ko mazboot rakho". Hazrat wala ne farmaya k ALLAH ki raah may jan ki bazi lagana ye sher mardon ka kaam hai jab k sust ho kar beth jana ya mujahiday se bachna ye lomree ki sifat hai.

adawat deen ko moond deti hai

Hadees pak ka mazmoon hai k "adawat deen ko moond deti hai" yani jab kisi se adawat (keena aur dushmani) hoti hai to admi kuchh naheen dekhta, apni deendari ka bhee lihaz naheen karta aur bus inteqam k lye deen ko bhee pas-e-pusht daal kar dil ki bharas nikalta hai. wo apnay har kameenay pan may shariat se daleel nikalnay ki koshish karta hai. Is ka shaikh batata hai k tumharay amal kitni nafsaniat hai. isi lye musleh ka hona bohat he zaroori hai. kyoon k beemar ki raey bhee beemar he hoti hai

ashiq-e-sifaat, ashiq-e-ehsan aur ashiq-e-zaat

aik hota hai ashiq-e-sifaat, aik hota hai ashiq-e-ehsan aur aik hota hai ashiq-e-zaat. Aashiq-e-sifaat to wo hai jis ko sirf sifaat se ishq hai, jesay kisi ko Razzaq ki sifat se is lye ishq hai k us ko khoob rizq mil raha hai. Aur ashiq-e-ehsan wo hai k jab nemat mil gai to khoob ashiq ho gya aur na mili to shikwa-o-shikayat shuru, ye to be-wafa, matlab ka yar hai. aur aik hota hai ashiq-e-zaat, yani jis haal may bhee wo rakhain un ki zaat par ashiq hai. nemat dain jab bhee razi aur agar wapis le lain ya na dain tab bhee razi. esay log har haal may ALLAH tala se muhabbat kartay rehtay hain. kyoon k jis k dil may ALLAH hota hai us k dil ka zarf bhee ALLAH tala bohat bara banatay hain. Ashiq-e-zaat be-wafa naheen hota, wo har haal may ba-wafa hota hai

jab ibadat adat bun jati hai to ikhlas k qareeb ho jati hai

jab ibadat adat bun jati hai to ikhlas k qareeb ho jati hai. Riya naam hai dikhaway ka. Makhlooq ki khatir koi amal karna ya makhlooq he ki waja se chhor dena dono riya hain. Agar aik admi roz parhnay ka aadi hai aur aaj koi dost aa gya to is khof se naheen par raha k wo dekh le ga to ye waswasa-e-riya hai riya naheen. riya naam hai iraday ka. yani irada aur niat hai dikhanay ki k banda dekh le ya samajh le kisi tarha. warna agar sirf khayal aa raha hai lekin niat naheen dikhanay ki to riya naheen sirf riya k waswasa hai. lihaza waswasay ki waja se apnay mamool k amaal na chhoray. Jesay aik admi roz namaz may 3 bar tasbeehaat parhta tha, lekin aik din jab seth aa gya to 7 dafa parhnay laga takay seth bohat naik samjhay aur paisa barha de to ye riya hai. lekin aik banda jo rozana ishraq ka paband hai aur aik din jab seth aya to dil may is khayal se k seth na dekh le wo amal chhor deta hai to ye riya naheen waswasa-e-riya hai.  Gharz ye k makhlooq k lye na to amal karay aur na he us ki waja se amal ko chhoray. Bus amal kye jaaey, jab adat ho jaey gee to ikhlas k qareeb ho jaey ga

roab aur wehshat may farq

Hazrat thanvi r.a. ne farmaya k "Roab wohi hai jo muhabbat k sath ho warna to wehshat hai" yani jis se muhabbat hoti hai usi ka dil may roab hota hai, warna thanay dar ka khof, saanp ka khof to hota hai lekin us ki azmat dil may naheen hoti. kyoon k muhabbat jo azmat k sath ho wohi moatabar hai

dikhawa aur numaish hubb-e-jah aur ujub ki waja se hota hai

dikhawa aur numaish hubb-e-jah aur ujub ki waja se hota hai. jab k mutakabbir jannat ki khushboo bhee na soongh sakay ga. Hazrat wala ne farmaya k nemat ko mehz ALLAH ki ata samajho apna kamal na samjho. Hazrat wala ne farmaya k agar taraqqee ka madaar maal, izzat aur hukoomat par he hota to Qaroon, Hamaan, Shaddad, Namrood Ambia alaihimussalam se zyada taraqqee yafta huay. Doosri baat ye k shukr karay. kyoon k shukr aur may ye baat poshida hai k ye ALLAH ki ata hai yani mai is ka bhee mustahiq naheen tha. jo apnay ko mustahiq na samjhay aur ALLAH ki ata samjhay to phir kibr kahan hua. apni taraf se nazar hut gai aur ALLAH tala ki taraf nazar ho gai. isi lye jo shukr se kibr khatam hota hai aur ALLAH tala se uns aur muhabbat barhti hai jab k takabbur se wehshat barhti hai. kyoon k mutakabbir ko jo nemat hasil ho us se zyada ka apnay ko mustahiq samajhta hai aur shukr naheen karta, na-shukri karta hai. isi lye shukr aur kibr may tazaad hai. jo shukr karta ho ga wo mutakabbir naheen ho ga aur jo mutakabbir ho ga wo na-shukra ho ga.

mushkilaat ka hal ALLAH ki taraf rujoo karna hai

Hazrat Eesa a.s. se un k aik hawari ne sawal kya k "agar koi lagataar teer par teer barsa raha ho us k teeron se bachnay ka kya hal hai? to Hazrat Eesa a.s. ne farmaya k mai apnay ALLAH se poochh kar bataoonga. to ALLAH tala ki taraf se un par wahee aai k Ay Eesa us ko ye jawab do k jo teer barsa raha hai us k qareeb ho jao (yani us k paas aa kar kharay ho jao to un teeron ki bochhar se bach jao ge)" Hazrat wala ne farmaya k:

balaain teer falak kamaan hai
chalanay wala shehnshah hai

yani ye masaaib aur parishanion ka hal ye hai k jahan se ye parishaniaan aa rahi hain us k qareeb ho jain to sub parishanion se bach jaaingay aur un se nijat hasil ho jaey gee. Parishani ka hal ye hai k jis (ALLAH) k hukum se parishani aa rahi hain us k qareeb ho jain aur us ko razi kar lain, jis ka tareeqa ye hai k gunah chhorain aur naik amaal ki pabandi karain.

na-mawafiq haalaat par sabr karnay se tawazo paida ho jati hai

Hazrat Thanvi r.a. ne farmaya k "logo ki muhabbat aur hujoom se andesha tha ujub k anay ka, ALLAH ne khansi de dee, ab har waqt khansta he rehta hoon".  is se pata chala k baaz dafa ilm, ibadaat se ujub-o-kibr paida ho jata hai jis k lye koi gham ya parishani de kar us ka ilaj kar dya jata hai. isi lye Hazrat wala ne farmaya k "nemat ka shukar ye hai k dimagh kharab na ho" Hazrat thanvi r.a. ne farmaya k "na-mawafiq haalaat par sabr karnay se tawazo paida ho jati hai"

jesay beemari se aksar aajzi aa jati hai kyoon k quwat ka ghumand naheen rehta, isi tarha kisi ne mizaj k khilaf ki to ab agar zabt kara to us se tawazo paida ho gee

Aqal aur Eeman k ilawa kefiaat ki amad-o-raft rehti hai

Aqal aur Eeman k ilawa har cheez ki amad-o-raft rehti hai" kefiaat, kashf waghaira sub atay jatay rehtay hain sirf aqal aur eeman mojood rehtay hain. yani aqal hoti hai k shariat-o-sunnat ko samajh kar amal karain, aur doosri baat ye k kefiaat chalay janay se log samajhtay hain k hum mardood ho gaey, maloom naheen eeman ka kya hua, esa naheen hai, eeman mojood rehta hai, wo kefiaat khatam hoti hain. isi lye kefiaat k anay janay se parishan nahee hona chahye, amal may lagna chahye.

be-sabri, uljhan, jhunjhalahat ka ilaj

kaam karnay k usool hain, jesay agar koi kaam shuru kya aur atak gya to usi taraf dihaan lagaey he na rakhay balkay dihan kisi aur jaiz kaam ki taraf laga de warna be-sabri uljhan paida ho gee aur dil mushawwish rahay ga. jesay drive kar raha hai aur signal band ho gya to ab musalsal usi taraf he dihan ko na lagaey rakhay k signal kab khulay ga ya signal kyoon naheen khul raha, is bajaey itna arsa zikr karta rahay, takay be-sabri na ho aur sawab alag

asbab-e-khushi se khushi mehsus karna to kafir bhee jantay hain

asbab-e-khushi se khushian mehsoos karna to kuffar balkay janwar bhee jantay hain, maslan kuttay billi bhee gosht k chheechray dekh kar khush ho jatay hain lekin baghair asbab-e-khushi k khushi k khushia urana aur haqiqi-o-daaimi bahar lootna ye aulia ALLAH ka he hissa aur unhee ka naseeba hai.

dushmano ko aish-e-aab-o-gil dya
doston ko apna dard-e-dil dya
un ko sahil pay bhee tughyani mili
hum ko toofano may bhee sahil dya

dunia k gham se tamanna-e-maut alamat-e-wilayat naheen

tamanna-e-maut alamat-e-wilayat may se hai lekin ye us waqt hai jab k wo liqa-e-mola (yani k mola ki mulaqat k shoq) k lye ho, warna dunia k ghamon se ghabra kar maut ki tamanna karna alamat-e-wilayat naheen, ye to mayoosi hai. islam may khud-kushi haram hai. kyoon k hamari jaan hamari apni milkiat naheen ALLAH ki amanat hai isi lye humain apni jan ko dunia ki khatiq halak karnay ka haq hasil naheen.

ab to ghabra k ye kehtay hain k mar jaingay
aur mar k bhee chayn na paya to kidhar jaingay

lekin jab jihad ka moqa ho to ab yahan par ALLAH ka hukum samajh kar apni jan ALLAH k hawalay kar de.

jis ne mehz samaraat k lye itaa'at ki us ne samaraat ki itaa'at ki

jis ne mehz samaraat k lye itaa'at ki us ne samaraat ki itaa'at ki. amal ALLAH ki riza k lye karay  duniavi samaraat k lye naheen. haan jannat bhee aik samra hai is ki niat se amal karay. lekin afzal yehi hai k ALLAH ki riza ki niat ho. Hazrat Haji Imdadullah Mahajir Makki r.a. farmatay hain k kaam par nazar chahye samara par na chahye. (samra yani phal ya nateeja). bohat se logo par samraat murattab naheen kye jatay, k itaa'at chhor daingay

rizq ki fikr aur makhlooq ka khof - ALLAH se hijab ka sabab

Hazrat Thanvi r.a. ne farmaya k 2 cheezain admi ko ALLAH se hijab may rakhti hain:

1. khof-e-makhlooq
2. Fikr-e-rizq

bad-gumani ka khayal dil may anay se bad-gumani naheen hoti

bad-gumani ka khayal dil may anay se bad-gumani naheen hoti, haan agar us ko dil se sahee bhee jaana to ab bad-gumani ho gee aur gunah milay ga, warna waswasa-e-bad-gumani hai bad-gumani naheen

jis ne ALLAH ki muhabbat na seekhi wohi dunyavi gham se pagal hua

jinhon ne ALLAH ki muhabbat naheen seekhi wohi dunyavi ghamon se pagal huay. ALLAH tala k siwa kisi se esa garha talluq na rakho k agar wo talluq khatam ho jaey to gham se pagal ho jaain. ALLAH walay is lye pagal naheen hotay kyoon k ALLAH tala hameesha sath hai judai naheen hai. jab k duniavi rishtay aik na aik din juda ho jatay hain jis gham hota hai. lihaza bv, bachon se muhabbat karay aur huqooq bhee ada karay lekin itni zyada muhabbat k agar chhoot jain to gham se pagal ho jain jaiz naheen. bv bachon aur maal ki muhabbad shadeed bhee jaiz hai lekin ashad muhabbat ALLAH ki ho, yani bv bachon ki 49 bhee jaiz hai lekin 51 ALLAH ki ho. Aaj tak kisi waliullah ne khudkushi naheen ki aur jinhon ne ki us ko ALLAH ki muhabbat aur dosti hasil he naheen hui thee, dhoka ho gya tha. Lihaza ALLAH se har haal may razi rehna esa he farz hai jesay namaz roza.

sabar ki qismain

sabr ki 3 qismain hain:

1. ibadat may sabr: yani jo faraaiz, wajibaat aur sunnat-e-muakkida hain un may agar susti mehsoos ho to himmat kar k ada karay aur apnay nafs par sabr karay

2. gunahon par sabr: yani jab koi gunah ka moqa aey to apnay nafs par sabr karay aur gunah na karay. jesay sood ya haram khanay ka moqa aey to esi rozi par laat maar de ya bad-nazri ka taqaza ho to himmat kar k nazar bacha le, aur nafs par sabr kar k ALLAH k rastay ka gham uthaey

3. museebaton pay sabr: yani jab koi museebat aey to ghabraey naheen aur mayoos na ho, ALLAH se razi rahay aur dua karta rahay.

rozana ALLAH ki rehmat ka intezar karna afzal ibadat hai kyoon k huzn (gham) khud aik bohat bara mujahida hai. jab in 3 baaton par sabr karay ga to phir ALLAH ka wada hai k esay sabr karnay walo k sath ALLAH hai. aur jis k sath ALLAH (jo sub se bari super power hai) ho us ko ghabranay ki kya zaroorat hai. Hazrat wala ka sher hai k:

jo gham k sath ho tum bhee
to phir ghar ka kya gham hai

bohat see baatain mehsoos karnay se ehm maloom hoti hain

bohat see baatain mehsoos karnay se ehm maloom hoti hain halan k itni ehm hoti naheen hain. lihaza mehsoos na karo aur hassas na bano. jesay bv ka rukh phair lena. is ko bohat zyada mehsoos naheen karna chahye. bv k sath apnay huqooq may ashiqana raho (jesay koi kaam naheen kar rahi to maaf kar do, rooth gai to khud hee mana lo...) lekin shariat k mamlay haakimana raho (jesay bv kahay k tasveer wali shirt, ya plastic k kuttay billi walay khilonay lanay ki farmaish karay to ye na mano). baqi agar is k ilawa kisi aur baat par agar bv ne naraz ho kar rukh phair lya aur phir jawab may aap ne bhee moo phair lya to aap ne shetan k lye darwaza khol dya. shetan ko khush honay ka moqa mat do aur Hadees pak may hai k "aurat terhi pasli ki hai in ko seedha karo ge to ye toot jaingi" aur aik aur hadees may hai k "ye aurtain kam aqal hoti hain". Lihaza in ki baaton ko maaf kar dena chahye, ye naheen k ye baat naheen karti to mai bhee baat nahee karoonga. bhai jahan bv itnay kaam tumharay karti hai wahan kabhee agar wo naraz ho gai to maaf kar do aur mana lo aur pyar karo. wo bhee to apna ghar baar, behn bhai, maa baap chhor kar aai hai aur tumhari har khidmat karti hai. lihaza ye mat socho k us ne mujhe naheen manaya to mai bhee naheen manaoonga aur seedha kar doonga. ye shetan ki bohat bari chaal hoti hai.

haseen larkon ko dekhna gunah hai haram hai

Hazrat wala ne farmaya k be-darhi moochh walay larko ko mat dekho. Hadees pak ka mazmoon hai k "amrado ko mat dekho, in k chehron may hooron ki jhalak hai" amrad kehtay hain esay larkay ko jis k darhi moochh na aai ho aur agar aa bhee gai ho lekin us ki taraf kashish mehsoos hoti ho aur melaan hota ho. lihaza esa larkon ko dekhna jaiz naheen. Aik buzurg farmatay hain k aik larki k sath aik sheta hota hai jab k aik larkay k sath 18 shetan hotay hain. Hazrat wala ne farmaya k kis tarha pata chalay k jis larkay se dosti hai us se nafsani talluq hai ya ALLAH k lye muhabbat hai us ki pehchan ye hai k jis se nafsani talluq ho us ki aik pehchan ye bhee hai k us k sath kabhee khuab may bhee gunah kartay dekhay ga. londay bazi bohat he bad-mashi ka gunah hai. ALLAH tala ne is gunah k karnay walon ki poori basti ulat dee thee. aur farmaya k ulti is lye thee kyoon k ye aurton ko chhor kar ulta kaam kartay thay.

husn-e-fani ki haqeeqat

Hazrat wala ne farmaya k ye haseen sub fani hain aik din sub mitti may mil kar khak ho jaingay. in k peechhay apni zindagi ko barbad na karo. Hazrat wala ka sher hai:

kisi khaki pay mat kar khak apni zindigani ko
jawani kar fida us par k jis ne dee jawani ko

aur farmaya:

gobar ki tashtari par chandi ka waraq hai
white color k husun se dhoka na khaye
(yani in sub haseeno k under goo moot k ilawa aur kuchh naheen jis par dunia mar rahi hai)

khak ho jaingay qabron may haseeno k badan
arzi dilbar ki khatir rah-e-payghambar na chhor
in k distumper ki khatir rah-e-payghambar na chhor

ye sub haseen mitti hain bus rang barangay distumper kar dye hain jis se log dhoka kha rahay hai. dunia bhee kharab aur akhrat bhee kharab

bad-kari se bachnay walay ko arsh ka saya milay ga

Hadees pak ka mazmoon hai k jis ko koi hasab-nasab wali khoobsoorat aurat kisi mard ko gunah ki dawat de aur ye mard jo quwat bhee rakhta ho lekin phir bhee ALLAH k khof se gunah na kya to qayamat k din ALLAH tala esay jawan ko Arsh ka saya ata farmaingay

gunahon bad-nazri aur haram kari k taqazon ka ilaj

1. Na Chit kar sakay nafs k pehlwan ko
to yoon haath paaoon bhee dheelay na dalay
aray is kushti to hai umer bhar ki
kabhee wo daba le kabhee tu daba le

2. jo nakam hota he rahay umer bhar bhee
behr haal koshish to ashiq na chhoray
ye rishta muhabbat ka qaaim he rakhay
jo 100 baar tootay to 100 baar joray

3. hum ne tay keen is tarha se manzilain
gir paray, gir kar uthay, uth kar chalay

4. bohat go walwalay dil k humain majboor kartay hain
teri khatir galay ka ghontna manzoor kartay hain
(ya "teri khair ye khoon-e-arzu manzoor kartay hain")

yani agar haram khuahishat ka taqaza ho to apni haram arzuon ka khoon kar do lekin ALLAH ko naraz na karo. apnay dil ko khush kar k ALLAH tala ko na-khush mat karo. ghair shareef hai wo banda jo apnay dil ko khush karta hai lekin ALLAH ko naraz karta hai. lihaza ALLAH ko razi karnay k lye apni arzuon ka khoon kar k gham-e-hasrat utha lo lekin un ko naraz na karo.

5. tabiat ki raw zor pay hai to ruk
warna ye had se guzar jaey gee
zara der ko tu hata le khayal
ye naddi charhi hai utar jaey gee

6. dil ki manoon ya khaliq-e-dil ki
dil k agay ye sawal rakha hai

gunahon (bad-nazri) k taqazon ka ilaj

Hazrat wala se kuchh no-jawano ne South Africa may kaha k aaj sahil-e-samandar par larkiaan aa rahi hain aur raqs ho ga. to Hazrat wala ne un ko aik sher farmaya:

us ne kaha come here
mai ne kaha no please
us ne kaha kya waja
mai ne kaha khof-e-khuda

aik buzurg farmatay hain k:

dil ki maanoon ya khliq-e-dil ki
dil k agay ye sawal rakha hai

apnay nafs par bharosa mat karo

Hazrat wala ne farmaya k apnay nafs par bharosa mat karo. 100 saal k bhee ho jao tab bhee aitibar na karo.

bharosa kuchh naheen is nafs-e-ammara ka ay zahid
farish bhee ye ho jaey to is se bad-guman rehna

baaz dafa nafs khud he sawal karta hai aur khud he jawab deta hai jesay k "naheen yar mai gunah ki niat se ye naheen dekh raha, ya mai to kuchh aur dekhna chahta tha waghaira." ye sub nafs ki chalain hain. dil ka har waqt inspection kartay raho k is may shetan kaheen ghairullah ka injection to naheen laga raha jis se rooh ka may infection ho jaey

hamaray nafs-e-ammara jab daam-e-butaan badla
to hum ne bhee baab-e-taqwa par foran pasban badla

yani dil par jo gateman muqarrar kya tha k nafs ki nigrani karay wo dushman se mil gya, ab khud he apnay sawalat ka jawab de raha hai.

jesay aik admi ne Hazrat wala se kaha k mai to har larki ko nikah ki niat se dekhta hoon. Hazrat wala ne farmaya k ye sub nafs ki chaal hai. kisi bhee niat se dekhna jaiz naheen. Na-mehram ko dekhna he haram hai chahay kisi bhee niat se dekhay, beti, behn, maa samajh kar ya kisi bhee niat se naheen dekh saktay. aik sahab ne Hazrat wala se kaha k Hazrat mera to dil saaf aur nazar pak hai. aur mai falan larki mujh se pakeeza muhabbat karti hai. Hazrat wala ne farmaya k aik din in ko akela chhor do phir dekho in ki pakeezgi k hangamay.

Hazrat wala ne farmaya k Hazrat Ali r.a. se zyada kis ki nazar aur dil pak ho saktay hain lekin Aap Sallallah-o-alaihi wasallam Hazrat Ali r.a. ko farma rahay hain k "Ay Ali! pehli nazar jo achanak par jaey wo maaf hai doosri naheen". to jab Hazrat Ali r.a. ko mustasna naheen farmaya to hum kon hotay hain ye kehnay walay k dil pak nazar saaf hai. Hazrat wala ne farmaya k jis ki ankh napak ho gee us ka dil bhee napak paleed ho ga

tamanna-e-gunah bhee haram hai

tamanna-e-gunah bhee to haram hai. yani ye sochna ya kehna k "Ay Kash agar wo mil jati ya mil jata to yoon toon karta" ye bhee haram hai. Tehqeeq-e-husn aur tafteesh-e-husn mar karo, warna gunah ho jaey ga. Tehqeeq-e-husn se murad k "larka hai ya larki" aur tafteesh-e-husn ye hai k "kali hai ya gori, kam khoobsoorat hai ya zyada khoobsoorat etc." Hazrat wala ne farmaya k:

na gori ko dekh na kali ko dekh
usay dekh jis ne inhain rand bakhsha

asbab-e-gunah se agar door na rahay to bach naheen saktay. ye ALLAH ki muhabbat aur ishq-o-mastiaan usi waqt tak ki hain jab tak asbab-e-guna se doori hai, jesay he asbab samnay atay hain to phir koi malfooz yaad naheen ata. sheta mismerism karta hai, 4 anay k husn ko 16 ana kar k dikhata hai, ghair mehram aurton par zyada light marta hai. isi lye asbab-e-gunah se 3 tarha ki doori ikhtiar karo:

1. aankh se doori k haseeno ko mat dekho

2. dil se doori, yani k dil may gunahon k khayalat ko mat pakao (na mazi k khayal la kar dil may mazay lo aur na mustaqbil ki koi scheme banao)

3. jism k aitibar se bhee doori ikhtyar karo. Hazrat wala ne farmaya k gunah k moqay par jis ki firar kamzor ho gee wo zaroor qarar karay ga. isi lye haseeno se door bhago aur ye sher parho:

jab wo agaey samnay na-beena bun gaey
jab wo hut gaey samnay se beena bun gaey

husn-e-fani pay agar tu jaey ga
ye munaqqash sanp hai dus jaey ga

nazar bazi mamooli gunah naheen

nazar bazi agar mamooli gunah hota to Aap Sallallah-o-alaihi wasallam is ko zina na farmatay. hadees pak hai k: "ankhon ka zina hai nazar bazi" aur Quran pak may hai k "Ay nabi Sallallah-o-alaihi wasallam aap momineen ko farma deejye k apni baaz nigahon ko neecha rakhain" aur aik aur hadees pak may aap Sallallah-o-alaihi wasallam ne esay khabeeson k lye bad-dua farmai k "laanat ho esay shakhs par ko bad-nigahi karay aur apnay ko dikhaey" yani na nazar bazi karay aur na he bun sanwar kar apnay ko kisi haseen k samnay nazar bazi k lye pesh karay ya apnay ko dikhaey.

jo karta hai tu chhup kar ehl-e-jahan se
koi dekhta hai tujhe asmaan se

nazar k chor k sir par naheen hai taj-e-wilayat
jo muttaqi naheen hota usay wali naheen kehtay

bad-nigahi se to eeman may kami ati hai
rafta rafta kabhee eeman  bhee chala jata hai

nagawar halat k baghair insan ALLAH se rujoo naheen karta

aam qaida ye hai k na-gawar halaat k baghair dunia se be-raghbati paida hoti naheen hai. lihaza har kaam may ALLAH ki hikmat hoti hai.

kisi ko ALLAH de kar azmata hai kisi se le kar azmata hai

aik buzurg fermatay hain k bohat se logo ko ALLAH de kar azmata hai aur bohat se logo se le kar azmata hai. de kar azmaish zyada sakht hai kyoon k jab nemat milti hai to log ALLAH ko bhool bethtay hain jab k nemat agar le lee jaey to admi ALLAH ki taraf rujoo ho jata hai. isi lye jab ALLAH tala se koi nemat mangay to us ka tahammul bhee mangay. kyoon k jinhon ne tahammul se barh kar maang lya aur phir us ko nibha na sakay to ya to ruswa ho gaey ya sakht azmaish may par gaey.

kisi ko denay may maslihat hai aur kisi ko na denay may

Hadees pak ka mazmoon hai k "bohat se log esay hain k jinhain ALLAH de de to wo kafir ho jain aur bohat se log esay hain k agar jin se ALLAH le lain to wo kafir ho jain" yani kuchh ko ALLAH detay hain kyoon k agar le lya to un k under sabr aur bardasht aur tahammul kam hota hai kufr buk dain. aur kuch ko detay he naheen k agar de dyato abhee is k under nemat ka zarf na ho ga aur nemat may mashghool ho kar ALLAH tala ko bhool jaey ga. ALLAH tala mizajon k khaliq hain k kis ko dena hai aur kis ko naheen dena. jis ko naheen dya us ko ALLAH se razi rehna chahye aur mayoos na hona chahye kyoon k ALLAH tala us ko riza ka maqam dena chahtay hain. esay logon ko aik zamana mujahida karaya jata hai takay razi reh kar ALLAH ki muhabbat dil may rasikh ho jaey aur jab nemat milay to nemat denay walay ko na bhoolain aur bandgi ka zawiya qaim rahay. Jin logon ne sabr kya wo siddiqeen k maqam tak ponhch gaey.

Taqwa may mushkil us waqt tak hai jab tak k himmat nahee kartay

Taqwa may mushkil us waqt tak hai jab tak k himmat nahee kartay. Jab himmat kar lo ge to taqwa asan ho jaey ga. ALLAH tala ne taqwa farz farmaya hai lekin farz karnay se pehlay himmat bhee dee hai. Agar ALLAH taqwa (gunahon se bachnay) ka hukum detay aur himmat na detay to ye zulm ho jata. aur ALLAH tala zulm se pak hain. jesay baap bachay ko rozana 1 kilo doodh peenay ka kahay lekin doodh na provide karay toye zulm hai. Jab baap doodh ka kehta hai to us se pehlay laa kar bhee deta hai

gheebat ka ilaj

Hazrat wala ne farmaya k jahan gheebat ho wahan se foran uth jao. aik sahab ne Hazrat wala se arz kya k Hazrat! jahan mai tha wahan gheebat ho rahi thee lekin wo hazraat mujh se baray thay mai un k samnay kesay uth'ta, to Hazrat wala ne farmaya k kitnay he baray hon ALLAH se baray naheen. Jahan ALLAH ki na-farmani ho wahan aik lamha rukna jaiz naheen. jis tarha gheebat karna gunah hai isi tarha sunna bhee gunah hai. jo gheebat karay to us moqay par jin ki gheebat ki ja rahi ho us ka defence karna wajib hai warna gheebat sunnay ka gunah ho ga aur wo bhee utna he shadeed hai. Gheebat k waqt ya to ye kahay k "naheen wo esay naheen wo to bohat achhay hain" ya ye keh kar rok de k "bhai ye gheebat ho rahi hai mujhe takleef hoti hai" is se un ki bhee ankhain khulaingee. aur agar is ki bhee taqat naheen to uth jana wajib hai, chahay kitna he baray hon ALLAH se bara naheen. jesay ye khayal hai k wo bura na maan jaain isi tarha ye khayal ho k ALLAH bura maan jaingay

maklooq ki itaa'at ki khatir khaliq ki na-farmani jaiz naheen

Hadees pak ka mazmoon hai k "la-taa'ata li-makhlooqin fil-maa'siat-il-khaliq" yani "makhlooq ki itaa'at k lye khaliq ki na-farmani (maa'siat) jaiz naheen"

isi lye agar walidain bhee shariat k khilaf gunah ka hukum dain to un ki itaa'at jaiz naheen, adab se mana kar de k mai ye naheen kar sakta. jesay darhi mundanay ka hukum dain, ya sharai parday se mana karain, ya TV dekhnay ka ya ghar se nikalnay ka mana karain, ya bv esay kapray ya khilonay ghar may lanay ka kahain jis may jandar ki tasveer ho to esay moqay par un ki baat na manaain. isi tarha jab JIHAD farz-e-ain ho jata hai to ab makhlooq ki itaa'at k lye khaliq ki  nafarmani jaiz naheen. kyoon k tamam huqooq may sub se pehla haq ALLAH ka hai

Hubb-e-jaah ye hai k "meri izzat ho" ya "meri izzat kam na ho".

Hubb-e-jaah ye hai k "meri izzat ho" ya "meri izzat kam na ho". Hazrat Thanvi r.a. ne farmaya k "tawaqqo tazeem ki na rakhay makhlooq se" aur ajeeb baat farmai k "ye jaah ka marz bhee zalim aam ho gya hai, log chahtay hain k koi hamari burai he na karay". Barai ka khayal to dil may aa sakta hai jo k ghair ikhtiari hai, lekin is ka aqli ilaj ye hain k:

1. nemat ko mehz atia-e-khudawandi samajh kar shukr karain

2. aqlan ye sochain k mai tamam musalmano se kamtar hoon fil haal aur tamam kafiron aur janwaron se kamtar hoon fil-ma'aaal (yani anjam k aitibar se) kyoon k iman ka daromadar khatmay par hai. Apnay ko aqlan bura aur haqeer samjhay chand din is ikhtiari mashq se ilaj ho jaey ga.

3. Jab admi apni nazar may achha hota hai to ALLAH ki nazar may bura hota hai aur jab apni nazar may bura hota hai to ALLAH ki nazar may achha hota hai khul gai jab se chashm-e-baseerat...apni nazron se khud gir gaey hum

ashiqon ka tareeqa

1. Ashiqon may mera naam likh jaey ga...apnay aamaal par gar nadamat rahay

2. Deen jis ka hai usi par aasra akhtar karo...kaam jis ka hai usi par apni sub fikron ko chhor

(Shaikh-ul-Arab Wal-ajam Arif Billah Hazrat-e-Aqdas Hazrat Maulana Shah Hakeem Muhammad Akhtar Sahab d.b.)